Таълим муассасаларида биринчи қўнғироқ тадбирлари бошланиши муносабати билан ЙҲХХ раҳбарияти пойтахтдаги бир қатор мактабларда бўлиб, ўқувчи ёшларни кутиб олишга қаратилган тайёргарлик жараёнлари билан танишди
2025-09-01 17:50:00 / Янгиликлар
Ташриф доирасида таълим даргоҳларига олиб борувчи йўлларнинг хавфсизлик даражаси, йўл чизиқлари ва белгиларининг ҳолати ўрганилди. Болаларнинг ҳаракатланишдаги хавфсизлигини таъминлаш йўналишида амалга оширилган ишларга алоҳида эътибор қаратилди.
Шунингдек, хизмат раҳбари ўқувчиларга йўл ҳаракати қоидаларини ўргатиш синфхоналарини кўздан кечириб, бу борада дарс берадиган ўқитувчиларнинг ҳам билим ва малакасини ошириш муҳим эканини таъкидлади.
ЙҲХХ ва мактаб маъмурияти ҳамкорлигида ўқув йили давомида турли тарғибот-ташвиқот тадбирлари, учрашувлар ва амалий машғулотлар ташкил этиш режалаштирилган.
Барча азиз ўқувчиларни янги ўқув йили ва биринчи қўнғироқ байрами билан самимий муборакбод этамиз. Янги билимлар, катта ютуқлар ва омадлар ҳамиша йўлдошингиз бўлсин!