Ўзбекистон Республикаси Ички ишлар вазирлиги

Маҳаллаларда жиноятчиликни барвақт олдини олиш, криминоген вазиятни барқарор ҳолда сақлаш, аҳоли муаммоларини доимий равишда ўрганиб, уларга самарали ечим топиш мақсадида «маҳалла еттиликлари» томонидан тизимли ишлар амалга оширилиб борилмоқда.

Шу мақсадда Сирдарё вилояти прокурори ҳамда вилоят Ички ишлар бошқармаси бошлиқлари Сирдарё туманининг «Қизил» тоифасига киритилган «Бунёдкор» маҳалласи еттиликларининг фаолияти билан яқиндан танишди ва уларнинг жиноятчиликка барҳам бериш, ҳуқуқбузарликларнинг барвақт олдини олиш, аҳоли бандлигини таъминлаш ҳамда маҳаллани рақамлаштириш борасидаги амалга оширилган ишларини атрофлича муҳокама қилди.

Ўрганишлар давомида маҳаллаларни жиноятдан холи ҳудудга айлантириш мақсадида аҳоли бандлигини таъминлаш, уларнинг ҳуқуқий маданиятини ошириш, ҳудудларни камералаштириш, ўқувчи ёшларни эса таътил даврида бўш вақтларини мазмунли ташкил этиш орқали салбий ҳолатлар юз беришининг олдини олиш, маҳалла ҳудудида жиноят ва ҳуқуқбузарликлар содир этилишига йўл қўймаслик, йўл ҳаракати хавфсизлигини таъминлаш борасида ишлаб чиқилган йўл харитаси бўйича амалга оширилаётган ишлар кўздан кечирилди.

Шунингдек, жамоат тартибини мустаҳкамлаш, фуқароларнинг хавфсизлигини таъминлаш ва йўл ҳаракати қоидаларига риоя этилиши масалаларига алоҳида урғу берилди. Масъуллар ушбу йўналишларда олиб борилаётган чора-тадбирларни янада кучайтириш зарурлигини таъкидлади.

Шу билан бирга Президентимизнинг 2025 йил 3 январдаги ПҚ-1 сонли қарори ижроси, ижтимоий профилактика ҳамда маҳалла еттилиги ҳамкорлигида амалга оширилаётган ишлар ҳам ўрганилиб, бу борада йўл қўйилган камчиликларни бартараф этиш юзасидан тегишли тавсия ва кўрсатмалар берилди.

Учрашув якунида, туман масъулларига маҳаллаларда фуқаролар хавфсиз яшашлари учун барча чора-тадбирларни амалга ошириш лозимлиги айтилиб, маҳалла ҳудудини хавфсиз масканга айлантириш бўйича масъулларга тегишли топшириқ ва кўрсатмалар берди.

Сирдарё вилояти ИИБ Ахборот хизмати