Қашқадарё вилоятида “Энг яхши эксперт-криминалист” кўрик-танловининг вилоят босқичи ўтказилди
2025-08-28 09:00:00 / Янгиликлар
Ўзбекистон Республикаси Президентининг 2022 йил 8 феврал кунидаги “Ички ишлар органларининг эксперт-криминалистика фаолиятини замонавий илм-фан ютуқларини кенг жорий этган ҳолда янада такомиллаштириш чора-тадбирлари тўғрисида”ги ПҚ-122 сон қарори ҳамда Ўзбекистон Республикаси ИИВнинг 2022 йил 27 апрел кунидаги “Ички ишлар органлари тизимида “Энг намунали эксперт-криминалистика жамоаси” ва “Энг яхши эксперт-криминалист” кўрик-танловларини ўтказиш тўғрисида”ги тегишли буйруқлари талаблари асосида жорий йилининг 19-август куни, Қашқадарё вилояти Ички ишлар бошқармасида вилоят ИИБ ҳамда шаҳар-туман ИИБ Эксперт-криминалистика ходимлари ўртасида “Энг яхши эксперт-криминалист” кўрик-танловининг вилоят босқичи ўтказилди.
Ушбу ўтказилган кўрик танлов учта шарт асосида ташкил этилиб, унда эксперт-криминалист ходимларининг интеллектуал салоҳияти, жисмоний ва жанговар тайёргарлиги ҳамда хизматга оид меъёрий ҳужжатларнинг юритилиши бўйича якка тартибдаги суҳбатлар асосида ўтказилди.
Кўрик танлов иштирокчилари ўзларининг соҳага оид билимлари, хизматга оид тажриба ва малакавий кўникмалари тест асосида синалди.
Иккинчи шартга кўра АКМ автоматидан ва ПМ пистолетларининг тўлиқсиз қисмларга ажратиш ва йиғишга доир малакаларини намойиш қилишди.
Шундан сўнг комиссия аъзолари иштирокида экспертларнинг соҳага доир махсус ва касбий билимларига қай даражада эга эканликлари, фаолияти давомида эришган ютуқлари ҳамда хизматга оид меъёрий ҳужжатларнинг юритилиши бўйича якка тартибда суҳбатлар ўтказилди.
Кўрик танлов натижаларига кўра, вилояти ИИБ ЭКМ катта эксперти капитан Худойбердиев Абдураззоқ биринчи ўринга, Кўкдала тумани ИИБ эксперт-криминалистика гуруҳи катта эксперти катта лейтенант Мардонов Фузаил иккинчи ўринга, Миришкор тумани ИИБ эксперт-криминалистика гуруҳи катта эксперти лейтенант Фармонов Жавоҳир учинчи ўринни эгаллаб, мазкур учлик республика миқёсида ўтказиладиган “Энг намунали эксперт криминалистика жамоаси” кўрик-танловида қатнашиш йўлланмасини қўлга киритди.
Кўрик танлов ғолиблари муносиб равишда тақдирланишди.
Қашқадарё вилояти ИИБ Ахборот хизмати