Хоразм вилояти Хавфсиз туризм ҳамда транспортда хавфсизликни таъминлаш бошқармаси ходимларига бир қатор устувор вазифалар белгиланди
2025-08-27 11:00:00 / Янгиликлар
Мамлакатимизда сайёҳларни жалб қилиш учун сўнгги йилларда нафақат тарихий ва маданий тадбирлар, шунингдек, жаҳон миқёсидаги спорт мусобақалари, дам олиш туристик масканлари, кўргазма намойишлари, илмий конференцияларни уюштириш билан ушбу йўналишда сайёҳлар оқимини жалб қилиш яхши анъанага айланиб бормоқда.
Вазир ўринбосари генерал-майор Баходир Мирзарахимов томонидан Хоразм вилояти Ички ишлар бошқармаси Хавфсиз туризмни таъминлаш бошқармасида бир қатор ўрганишлар олиб борилиб, вилоятнинг бевосита туризм намойиши объектлари ва инфратузилмаси ҳудудларида жамоат тартибини сақлаш, ҳуқуқбузарликларнинг барвақт олдини олиш ва жиноятчиликка қарши курашиш соҳасида амалга оширилган ишлар бирма-бир таҳлил қилиниб, тегишли топшириқлар берилди.
Шунингдек, Транспортда хавфсизликни таъминлаш бошқармаси хизмат ҳудудида ҳуқуқбузарлик ва жиноятчиликнинг барвақт олдини олиш, фуқаролар томонидан келиб тушаётган мурожаатлар билан ишлаш, содир этилган жиноятларни «иссиқ изи»да фош этиш, ички ишлар органлари ходимларининг хизмат интизоми, қонунчиликка риоя этиш борасидаги бир қатор кўрсатмалар берилди.
Хусусан, вилоят кесимида хизмат ҳудудларидан ўтувчи темир йўл изларига яқин жойлашган маҳалла, корхона ва таълим муассасаларида профилактик учрашувлар ўтказилиши, транспорт объектларида бахтсиз ҳодисаларнинг барвақт олдини олиш, вокзал ишчилари ва йўловчи фуқаролар ўртасида ҳуқуқбузарлик ва жиноятларнинг олдини олиш ва уларнинг профилактикаси, жамоат тартибини сақлаш, фуқаролар ҳушёрлиги ва огоҳлигини ошириш, шунингдек, ходимлар ўртасида ижро интизоми, қонунчилик талабларига қатъий риоя қилишлари, ходимларнинг хизмат фаолияти устидан кунлик назоратни кучайтириш, коррупцияга йўл қўймаслик бўйича масъул ходимларга кўрсатмалар берилди.
Хоразм вилояти ИИБ Ахборот хизмати