Сирдарё вилоятида Мустақиллик байрами тадбирларини тинч ва осойишта ўтказишга кенг кўламли тайёргарлик кўрилмоқда
2025-08-24 09:30:00 / Янгиликлар
Юртимизда Мустақиллигимизнинг 34 йиллигига бағишланган байрам тадбирларини юқори савияда, халқимизга хос шукуҳ ва руҳда, тинч ва осойишта ўтказиш мақсадида Сирдарё вилояти ҳудудида кенг кўламли чора-тадбирлар амалга оширилмоқда.
Шу муносабат билан Ўзбекистон Республикаси Ички ишлар вазирлиги масъул раҳбари ҳамда Сирдарё вилояти Ички ишлар бошқармаси бошлиғи раҳбарлигида мутасадди идора ва хизматлар раҳбарлари иштирокида йиғилиш бўлиб ўтди.
Йиғилишда байрам тадбирлари даврида жамоат тартибини сақлаш, фуқаролар хавфсизлигини ҳамда йўл ҳаракати хавфсизлигини таъминлаш, шунингдек, ҳуқуқбузарликларнинг олдини олиш бўйича аниқ вазифалар белгилаб берилди.
Шунингдек, масъул раҳбарлар томонидан шахсий таркибга хизмат бурчларини сидқидилдан бажариш, фуқаролар хавфсизлиги ва тинчлигини таъминлаш устувор вазифа эканлиги таъкидланди.
Шундан сўнг, раҳбарият «Қалқон» платформаси фаолияти билан яқиндан танишиб, байрам ўтказиладиган масканларда жамоат тартиби ва йўл ҳаракати хавфсизлигини таъминлаш юзасидан масъулларга кўрсатмалар берди.
Сирдарё вилояти ИИБ Ахборот хизмати