Сирдарё вилояти ИИБ бошлиғи Янгиер шаҳридаги маҳаллаларда жиноятчилик ва ҳуқуқбузарликларни барвақт олдини олиш ишларини ўрганди
2025-08-19 12:50:00 / Янгиликлар
Ўзбекистон Республикаси Президентининг 2025 йил 3 январь кунидаги ПҚ 1-сон Қарори ижросини таъминлаш мақсадида Сирдарё вилоятида аҳоли орасида ҳуқуқбузарлик ва жиноятларнинг олдини олиш, фуқароларнинг ҳуқуқий онги ва маданиятини юксалтириш мақсадида амалий ишлар йўлга қўйилган.
Хусусан, Сирдарё вилояти ИИБ бошлиғи подполковник Фарух Хайдаров Янгиер шаҳридаги маҳаллаларда жиноятчилик ва ҳуқуқбузарликларни барвақт олдини олиш, маҳаллада криминоген вазиятни барқарорлаштириш борасида амалга оширилаётган ишлар билан танишди.
Ўрганишлар давомида бошқарма бошлиғи мазкур йўналишда амалга оширилиши зарур бўлган вазифалар юзасидан тегишли кўрсатма ва топшириқлар бериб ўтди.
Бундан ташқари, бошқарма бошлиғи уйма-уй юриб фуқаролар билан юзма-юз суҳбат қуриб, аҳолининг турмуш шароити, эҳтиёж ва таклифларини ўрганди. Муаммоларни жойида ҳал қилиш мақсадида масъул раҳбарларга зарур кўрсатмалар берилди.
Бошқарма бошлиғи таъкидлаганидек, жиноятчиликнинг олдини олишда маҳалла фаоллари, ҳудуд профилактика инспекторлари ва аҳолининг ўзаро ҳамкорлиги ҳал қилувчи аҳамиятга эга. Шу боис, жойларда бу йўналишдаги ишлар изчил давом эттирилмоқда.
Сирдарё вилояти ИИБ Ахборот хизмати