ИИВ Маънавий - маърифий ишлар ва кадрлар билан таъминлаш департаменти раҳбарияти томонидан навбатдаги шахсий қабул ўтказилди
2025-08-14 10:30:00 / Янгиликлар
Ички ишлар вазирлиги ҳамда унинг ҳудудий бўлинмалари фуқаролар мурожаатларини самарали кўриб чиқиш тизимини такомиллаштириш мақсадида мунтазам равишда шахсий ва сайёр қабуллар ўтказиб келмоқда. Бундай амалиёт аҳоли эҳтиёж ва муаммоларини бевосита тинглаш, уларга амалий ёрдам бериш, жойлардаги ҳолатни чуқур ўрганиш ҳамда тизим иш фаолиятини янада яхшилашга хизмат қилмоқда.
13 август куни, Ички ишлар вазири ўринбосари, генерал-майор Даврон Назармухамедов бошчилигида навбатдаги шахсий қабул ташкил этилди. Унда кадрлар сиёсати, хизмат фаолияти, пенсия тайинлаш масалалари, шунингдек, ходимларнинг ижтимоий таъминоти билан боғлиқ масалалар атрофлича кўриб чиқилди.
Мазкур тадбир Тошкент шаҳридаги ИИВ Транспорт ва туризм объектларида хавфсизликни таъминлаш бошқармаси биносида ўтказилди. Мурожаат қилган фуқароларнинг ҳар бир масаласи диққат билан ўрганиб чиқилди, зарур ҳуқуқий тушунтиришлар берилди ҳамда айрим мурожаатлар юзасидан жойида ҳал этиш чораси кўрилди.
Учрашув фуқаролар билан очиқ мулоқот ўрнатиш, ички ишлар тизимига бўлган ишончни ошириш ва инсон манфаатларини устувор қилиш йўлидаги амалий саъй-ҳаракатларнинг яққол ифодаси бўлди.