Интерпол ММБнинг ходимлари Хоразм вилояти ва Қорақалпоғистон Республикасида ахборот соҳасидаги ҳамкорлик масалалари юзасидан учрашувлар ўтказдилар
2025-08-12 12:00:00 / Янгиликлар
Ўзбекистон Республикаси Ички ишлар вазирлигининг жорий йилнинг учинчи чорагига мўлжалланган хизмат сафарлари режасига мувофиқ, Интерпол Миллий марказий бюроси ходимлари Хоразм вилояти ва Қорақалпоғистон Республикасига ташриф буюрдилар.
Хизмат сафари давомида Интерпол ММБ ходимлари, бюро бошлиғи ўринбосари полковник Г. Алимуҳамедов раҳбарлигида, Интерпол йўналиши бўйича ҳамкорликни ахборот билан таъминлашни ташкил этиш масалалари юзасидан учрашувлар ва муҳокамалар ўтказдилар. Шунингдек, Хоразм вилояти ИИБ ва Қорақалпоғистон Республикаси ИИВ ҳудудий бўлинмаларининг масъул ходимлари билан ўзаро ҳамкорлик алоқалари мустаҳкамланди.
Қорақалпоғистон Республикаси ИИВ ва Хоразм вилояти ИИБ ходимларига амалий ёрдам кўрсатиш мақсадида ИИВ ва ИИБ раҳбарлари иштирокида йиғилишлар ўтказилди. Ушбу йиғилишларда шахслар ва автотранспорт воситаларини халқаро қидирувини ташкил этиш, терроризм ва гиёҳванд моддалар ноқонуний айланишига қарши курашиш, вояга етмаганлар иштирокидаги жиноятлар, шунингдек ахборот-коммуникация технологиялари соҳасидаги ва бошқа турдаги жиноий фаолиятга оид масалалар кўриб чиқилди. Шу билан бирга, Интерпол йўналиши бўйича ҳамкорликка масъул ходимларга Ўзбекистон ИИВнинг 2022 йил 26 ноябрдаги “Ўзбекистон Республикаси ички ишлар органларида Интерполнинг Миллий марказий бюроси фаолиятини тартибга солиш тўғрисида“ги 515-сонли буйруғи қоидалари кенг ва батафсил тушунтирилди. Халқаро қидирувни ташкил этишдаги муаммолар ўрганилди ҳамда уларни Интерполнинг халқаро ҳамкорлик соҳасидаги имкониятларидан фойдаланган ҳолда бартараф этиш йўллари белгиланди.