Фуқаролар мурожаатлари билан ишлаш тизими самарали ташкил этилмоқда
2025-07-07 21:30:00 / Янгиликлар
Ички ишлар вазирлиги ҳамда унинг ҳудудий органлари томонидан фуқаролар мурожаатлари билан ишлаш тизимини самарали ташкил этиш мақсадида мунтазам равишда шахсий ва сайёр қабуллар ўтказиб келинмоқда. Бу амалиёт аҳолининг муаммоларини бевосита эшитиш, уларга амалий ёрдам кўрсатиш, жойлардаги вазиятни чуқур ўрганиш ва тизим иш самарадорлигини оширишда муҳим рол ўйнамоқда.
Жорий йилнинг 6 август санасида, Ички ишлар вазири ўринбосари, генерал-маёр Даврон Назармухамедов томонидан навбатдаги шахсий қабул ўтказилди. Қабул Тошкент шаҳридаги ИИВ Транспорт ва туризм обйектларида хавфсизликни таъминлаш департаменти биносида бўлиб ўтди.
Қабул давомида фуқароларнинг ижтимоий ҳимоя, хизмат жойини кўчириш, ишга кириш ҳамда ички ишлар ходимларининг хатти-ҳаракатларига оид мурожаатлари тингланди. Ҳар бир мурожаат алоҳида кўриб чиқилиб, тегишли ҳуқуқий тушунтиришлар берилди, айрим масалалар эса жойида ҳал этилди.
Мазкур қабул фуқаролар билан очиқ ва самимий мулоқотни йўлга қўйиш, ички ишлар органларига бўлган ишончни янада мустаҳкамлаш, инсон манфаатларини биринчи ўринга қўйишга қаратилган тизимли ишларнинг мантиқий давомидир.