Термизда оммавий сайёр қабул: фуқаролар мурожаатлари ҳал этилди, марҳум ходимлар хотираси ёдга олинди
2025-07-26 16:25:00 / Янгиликлар
2025 йил 26 июль куни Термиз шаҳрида Ўзбекистон Республикаси ИИВ Йўл ҳаракати хавфсизлиги хизмати раҳбарияти ҳамда Сурхондарё вилояти ИИБ томонидан оммавий сайёр қабул ўтказилди. Қабулда жисмоний ва юридик шахслар иштирок этиб, ички ишлар соҳасига оид турли масалалар — тергов-суриштирув, ишга қабул, йўл ҳаракати хавфсизлиги, фуқароликни расмийлаштириш, моддий ёрдам ва бошқа муаммолар юзасидан мурожаатларини билдиришди.
Қабул давомида келиб тушган мурожаатларнинг бир қисми жойида ижобий ҳал этилди, айримларига ҳуқуқий тушунтиришлар берилди, қолган мурожаатлар эса қўшимча ўрганишни талаб қилгани сабабли масъул раҳбарларга топшириқлар берилиб, ижроси қатъий назоратга олинди.
Шу куни хизмат бурчини бажариш чоғида ҳалок бўлган сержантлар Намозов Баҳриддин ва Луков Лочинбекларнинг оилалари ҳолидан хабар олиниб, ижтимоий ва моддий ёрдам кўрсатиш бўйича тегишли чоралар белгиланди. Марҳум ходимларнинг жасорати ва фидокорлиги эҳтиром билан ёдга олинди.
Ушбу тадбир аҳоли билан очиқ мулоқотни таъминлаш, фуқароларнинг қонуний ҳуқуқ ва манфаатларини ҳимоя қилиш, уларнинг дард-ташвишларини тинглаш ҳамда амалда ҳал қилишга қаратилди.
ИИВ Йўл ҳаракати хавфсизлиги хизмати Ахборот хизмати