Тошкент вилоятида жиноятчиликка қарши курашиш ва жамоат хавфсизлигини таъминлаш борасидаги 6 ойлик натижалар муҳокама қилиниб, келгусидаги устувор вазифалар белгиланди
2025-07-20 19:00:00 / Янгиликлар
Тошкент вилояти ИИББда жорий йилнинг биринчи ярми давомида жиноятчиликка қарши курашиш, ҳуқуқбузарликларнинг барвақт олдини олиш ҳамда жамоат хавфсизлигини таъминлаш йўналишида амалга оширилган ишлар таҳлилига бағишланган ҳисобот йиғилиши бўлиб ўтди.
Йиғилишда Ўзбекистон Республикаси ички ишлар вазирининг биринчи ўринбосари, полковник Аюбхон Раҳматуллаев ҳамда Тошкент вилояти ИИББ бошлиғи, генерал майор Тоҳир Арипов иштирок этди. Йиғилишда, шунингдек, Тошкент вилоятидаги барча шаҳар ва туман ички ишлар бўлимлари шахсий таркиби видеоселектор тарзида қатнашди.
Тадбир давомида ҳудуддаги криминоген вазият, жиноятчилик даражаси, профилактик чоралар самарадорлиги, йўл-ҳаракати хавфсизлигини таъминлаш, жамоат тартибини сақлаш борасидаги фаолиятлар атрофлича муҳокама қилинди. Ҳисоботлар асосида эришилган ютуқлар билан бир қаторда, йўл қўйилган камчиликлар ҳам танқидий таҳлил қилинди.
Йиғилишда жиноятчиликнинг айрим турлари ошган шаҳар ва туманлар кесимида мутасаддиларга аниқлаштирилган профилактик ва тезкор тадбирларни амалга ошириш бўйича аниқ топшириқлар берилди. Айниқса, «қизил» тоифадаги маҳаллаларда ижтимоий-маънавий муҳитни барқарорлаштиришга қаратилган чора-тадбирларни кучайтириш муҳимлиги таъкидланди.
Шунингдек, Ўзбекистон Республикаси Президентининг 2025 йил 3 январдаги ПҚ-1-сонли қарорида белгиланган вазифалар ижроси, ходимлар ўртасида хизмат интизоми ва қонунийликни мустаҳкамлаш, коррупция ва тамагирлик ҳолатларининг олдини олиш масалаларига алоҳида урғу берилди. Тизимда йўл қўйилган хатолик ва камчиликлар учун айрим раҳбарларга нисбатан интизомий чоралар қўлланилгани, бу каби ҳолатлардан барча ходимлар хулоса чиқариши лозимлиги қатъий эслатиб ўтилди.
Йиғилиш якунида ички ишлар органлари олдида турган долзарб вазифалар, хусусан, жиноятчиликка қарши курашишнинг самарадор услубларини амалиётга жорий этиш, жамоат хавфсизлигини таъминлаш борасида илгари сурилган ташаббус ва режалар белгилаб олинди.
Бу орқали фуқароларнинг ҳуқуқ ва эркинликларини ҳимоя қилиш, тинч ва осойишта ҳаёт кечиришлари учун янада барқарор шароит яратишга алоҳида эътибор қаратилди.
Тошкент вилояти ИИББ Ахборот хизмати