Андижон вилояти ИИБда Ички ишлар вазирлиги раҳбарияти иштирокида жорий йилнинг ўтган 6 ойи давомида амалга оширилган ишлар юзасидан ҳисобот йиғилиши ўтказилди
2025-07-17 11:05:00 / Янгиликлар
Жорий йилнинг 16 июль куни Андижон вилояти ИИБда Ички ишлар вазирининг ўринбосари генерал-майор Бекмурод Абдуллаев раислигида бўлиб ўтган ҳисобот йиғилишида вилоят ҳудудида ўтган 6 ой мобайнида жиноятчиликка қарши курашиш, ҳуқуқбузарликлар профилактикасини таъминлаш, жамоат тартиби ва фуқароларнинг осойишталигини сақлаш борасида олиб борилган тезкор профилактик тадбирлар натижалари танқидий муҳокама қилинди.
Бўлиб ўтган муҳокама йиғилишида бошқарма соҳавий хизмат ходимлари, Андижон шаҳри бўйича ИИО ФМБ ва туман ИИБ бошлиқлари, ўринбосарлари, тергов ҳамда ташкилий бўлинма бошлиқлари, ИИВнинг вилоят ҳудудидаги тузилмалари бошлиқлари ва шаҳар-туман ИИБнинг барча шахсий таркиби видеоконференция тизими орқали туман студияларидан иштирок этди.
Таҳлиллар асосида масъул раҳбарларнинг ҳисоботлари тингланди.
Хусусан, Андижон вилояти ИИБ ходимлари томонидан олиб борилган манзилли ишлар натижасида ўтган биринчи ярим йиллик давомида вилоятдаги мавжуд 909 та маҳалланинг 539 тасида жиноятлар содир этилишига йўл қўйилмади.
Шунингдек, вилоят ҳудудида 6 ой мобайнида жами 227 та йўл-транспорт ҳодисалари содир этилиб, ўтган йилга нисбатан 19 тага камайишига эришилган.
Муҳокама натижаларига кўра хизмат вазифаларини бажаришда камчиликларга йўл қўйиб келган бир қатор раҳбар ва ходимларга нисбатан қаттиқ интизомий таъсир чоралари қўлланилди.
Шу билан бирга вилоят ҳудудида намунали жамоат тартибини сақлаш, фуқаролар хавфсизлигини таъминлаш, ҳуқуқбузарлик ва жиноятчиликни барвақт олдини олишда бошқа ҳамкасбларига алоҳида ўрнак кўрсатиб келаётган бир гуруҳ ходимлар муносиб рағбатлантирилди.
Йиғилиш сўнггида фуқаролар хавфсизлиги ҳамда жиноятчилик ва ҳуқуқбузарликларни барвақт олдини олишда тамомила янгича тизим асосида иш ташкил этиш бўйича кўрсатмалар бериб ўтилди.
Андижон вилояти ИИБ Ахборот хизмати