Ўзбекистон Республикаси Ички ишлар вазирлиги

Ички ишлар вазири ўринбосари, генерал-майор Баходир Мирзарахимов ҳузурида Навоий вилояти ҳудудида жиноят ва ҳуқуқбузарликларнинг олдини олиш борасида амалга оширилган ишлар, йўл қўйилган хато ва камчиликлар, келгусидаги устувор вазифалар ҳамда II чорак якунлари муҳокамасига бағишланган йиғилиш ўтказилди. Танқидий-таҳлилий руҳда ўтган мазкур йиғилишда Бошқарма бошлиғининг ўринбосарлари, соҳавий хизмат, шаҳар-туман ИИБ раҳбарлари ҳамда уларнинг ўринбосарлари иштирок этишди.

Дастлаб, вилоят ҳудудида ҳуқуқбузарлик ва жиноятчиликнинг барвақт олдини олиш борасида амалга оширилган ишлар, ички ишлар бўлимлари ва соҳавий хизматлар фаолияти таҳлил қилинди. II чорак давомида вилоят ҳудудида криминоген вазиятни янада яхшилаш, жиноят ва ҳуқуқбузарликларга қарши курашиш, жамоат тартибини сақлаш, йўл-ҳаракати хавфсизлигини таъминлаш ҳамда маҳаллаларда хавфсиз муҳитни яратиш борасида амалга оширилган ишлар, эришилган ютуқлар, йўл қўйилган камчиликларга алоҳида тўхталиб ўтилди. Шунингдек, жиноятчиликнинг айрим турлари ошган ҳудуд масъул раҳбарларининг фаолияти жиддий танқид остига олинди ва бу борада амалга оширилиши лозим бўлган тезкор-профилактик тадбирларни янада кучайтириш юзасидан топшириқлар берилди. Йўл-транспорт ҳодисаларининг олдини олишда профилактик ишларнинг етарлича ташкил этилмаётганлиги оқибатида ЙТҲлари бирмунчага ошганлиги алоҳида таъкидланди.

Йиғилиш якунида Ўзбекистон Республикаси Ички ишлар вазири ўринбосари, генерал-майор Баходир Мирзарахимов ҳамда Бошқарма бошлиғи, полковник Азат Тасбаевлар сўз олиб, Вазирлик раҳбарияти томонидан берилган вазифа ва топшириқларни барча шахсий таркиб алоҳида намуна кўрсатган ҳолда виждонан бажариши лозимлиги, фуқаролар хавфсизлигини таъминлашда бор билим ва салоҳиятини намоён қилиш, янгича дунёқараш билан халқимиз хизматида бўлишлари лозимлиги, тамагирлик ва мансаб ваколатларини суиистеъмол қилмаслик, коррупцион ҳолатларга йўл йўл қўймаслик, фуқаролардан келиб тушган мурожаатларни ўз вақтида ва қонуний тартибда кўриб чиқишлари муҳимлиги айтилди.

Келгусида жиноятчиликни олдини олиш, жиловлаш ва фош этиш, фуқаролар тинчлиги, осойишталигини таъминлаш борасида чора-тадбирлар белгиланиб, зарур топшириқлар берилди ва тегишли қарорлар қабул қилинди.

Навоий вилояти ИИБ Ахборот хизмати