Ходимнинг бир куни. Майда зарралардаги катта ҳақиқатлар
2025-07-14 16:30:00 / Янгиликлар
Бугунги лавҳамиз қаҳрамони Навоий вилояти ИИБ Эксперт-криминалистика маркази бош эксперти, капитан Жавлон Файзиев. У соҳада қарийб 10 йиллик касбий тажрибага эга, жиноятларни очишга муносиб ҳисса қўшиб келяпти. Шунингдек, кўплаб тарғибот тадбирларида ҳам фаол иштирок этади.
- Эксперт-криминалистика соҳаси йўналишида ИИВ Академиясида таҳсил олдим. Хизматимиз масъулиятли, аммо қизиқарли воқеаларга ва ҳодисаларга жуда бой, — дейди лавҳамиз қаҳрамони.
Суҳбатимиз шу ўринда узилди. У навбатчи ходим сифатида тергов-тезкор гуруҳи таркибида воқеа жойига чиқиб кетди. Олинган хабарга кўра, Навоий шаҳрининг «Жанубий» кўчасида жойлашган автотураргоҳдаги фуқаронинг машинасидан қимматбаҳо буюмлар ҳамда кўп миқдордаги пул ўғирланган экан.
Капитан Жавлон Файзиев автомашинадан олинган далилий ашёларни лабораторияда экспертиза текширувидан ўтказди. У ичимлик идишидаги қўл бармоқ изларини дактилоскопик текширувдан ўтказиш чоғида гумон қилинувчининг шахсини аниқлади. Ўғри қанчалик устаси фаранг бўлмасин, Жавлон Файзиевнинг тадқиқотлари натижасида унинг жинояти фош этилди.
Шу куни Жавлон Файзиев яна кўплаб тадқиқотлар ўтказди. Бундан ташқари, навбатчи бўлгани учун тунги назорат-рейд тадбирида ҳам қатнашди. Шубҳали шахслар ва ҳуқуқбузарларнинг шахсига аниқлик киритишда яна дактилоскопик экспертиза қўл келди. Сўнг марказда экспертиза тадқиқотлари ўтказишда давом этди. Эртаси куни эрталаб унинг навбатчилиги якунига етди. Кун аввалида бошлаган ишларини тугатиб, экспертиза хулосаларини терговчиларга тақдим этди.
Маҳлиё Холова, ўз мухбиримиз. «Постда»
Навоий вилояти