Ўзбекистон Республикаси Ички ишлар вазирлиги

Подполковник Зиёдулло Мейлиевнинг уяли телефони жиринглади. «Эшитаман» дейиши биланоқ аёлнинг йиғи аралаш овози эшитилди: «Боламнинг «коляска»сини ўғирлаб кетишибди». Профилактика катта инспектори зудлик билан ҳолат юз берган мавзега етиб борди. Кўп ўтмай, жиноят кузатув камералари орқали «иссиқ изида» фош этилди.

Бир оиланинг муаммоси ҳал бўлганидан кўнгли ёришди. Эртага маҳалла фуқаролар йиғинида ўтадиган йиғилишда шу масалани кўтаради. Чунки сўнгги пайтларда кўп қаватли уйлар йўлагида қаровсиз қолдирилган велосипед, болалар аравачалари ва скутер ўғрилиги кўпайиб боряпти. Олди олинмаса, бундай жиноятлар ва жабрланувчиларнинг сони ортиши турган гап.

Пойтахтимизнинг Чилонзор тумани ИИО ФМБ 2-сонли ички ишлар бўлими Ҳуқуқбузарликлар профилактикаси бўлинмаси профилактика катта инспектори, подполковник Зиёдулла Мейлиев «Катта Чилонзор-1» маҳалласи ҳудудида хизмат олиб боради. Маҳалла аҳолиси 6250 нафар, 60 та кўп қаватли уй мавжуд.

Подполковник З.Мейлиев жорий йил бошидан бугунги кунга қадар маҳаллада истиқомат қилувчи 12 нафар оилавий жанжалкаш, 8 нафар ичкиликбозликка ружу қўйган шахс билан профилактик тадбирларни амалга оширди. Шунингдек, у 15 нафар муқаддам судланган, 3 нафар пробация хизмати назоратидаги, 12 нафар ички ишлар органларида профилактик ҳисобда турган шахс билан тез-тез мулоқот ўтказади.

Таъкидлаш керакки, жонкуяр подполковникни маҳалла аҳли ҳурмат қилади, қўллаб-қувватлайди. Айниқса, фуқаролар йиғини раиси Фазлиддин Ниёзматов билан ҳамкорлик ўз самарасини бер-масдан қолмаяпти. Маҳаллада жорий йилнинг ўтган даврида бирорта жиноят қайд этилмагани бунинг исботидир.

Ўрни келганда қайд этиш жоиз, Қашқадарё вилоятида туғилиб ўсган Зиёдулла Мейлиев отаси — истеъфодаги подполковник марҳум Маҳаммади Мейлиевга ҳавас қилиб, мазкур соҳада ишламоққа аҳд қилган. Ички ишлар органларида 2004 йилдан буён хизмат қилиб келади.

Кўп йиллик хизмат тажрибасига эга подполковник Зиёдулла Мейлиевдан «Ҳар бир профилактика инспекторига муваффақият келтирувчи «универсал» усул борми?» деб сўраганимизда, у қуйидагича жавоб берди:

Профилактика инспектори бир жойда ўтирса, иш битмайди. Одамлар орасида бўлсангиз, уларнинг ишончини қозонсангиз, аҳолининг ўзи сизга маслаҳати, амалий ҳаракати билан ёрдам беради.

Лавҳамиз қаҳрамони хизматда жасур ва тажрибали ходим, уйда эса вафодор ёр, меҳрибон ота. У турмуш ўртоғи Ферузахон билан икки нафар ўғил ва бир қизни тарбиялаб, вояга етказмоқда. Оила аъзолари уни ишдан қайтишини интиқ бўлиб кутишади.

Дарҳақиқат, бир инсон учун одамларга нафи тегадиган касбда ишлаш, жамоада ҳурмат қозониш, фарзандларига ғамхўрлик қилишданда ортиқ бахт борми-кан?!

©️ “Postda” газетаси, Адолат Файзиева, Тошкент шаҳри.