Фаолият самарадорлиги йўлида. Жазони ижро этиш муассасалари навбатчилик қисмлари учун 10 дона «Дамас» автомашиналари топширилди
2025-07-09 10:00:00 / Янгиликлар
Жамиятда тинчлик ва хавфсизликни таъминлаш, шу жумладан, жазони ижро этиш муассасаларида тартиб-интизомни мустаҳкамлаш – бу соҳадаги ҳар бир тизим бўғинининг самарали фаолиятига боғлиқ.
Жазони ижро этиш муассасаларидаги навбатчилик қисмлари эса айнан шу вазифаларни куну-тун, узлуксиз ва юқори масъулият билан бажараётган бўлимлардан биридир. Уларнинг самарали иш фаолияти, аввало, тегишли моддий-техника базасига, замонавий транспорт воситалари ва ускуналар билан таъминланганлик даражасига боғлиқ.
Шу мақсадда, Жазони ижро этиш департаменти томонидан тизим фаолиятини янада самарали ташкил этиш, навбатчилик қисмларининг ҳаракатчанлигини ошириш ва фавқулодда ҳолатларда тезкор ҳаракат қилиш имкониятларини кучайтириш йўлида муҳим қадам қўйилди.
Хусусан, Департаментнинг бюджетдан ташқари маблағлари ҳисобидан 10 дона «Дамас» автотранспорт воситаси харид қилинди.
Ушбу янги автомашиналар Департамент тизимидаги 10 та манзил-колониянинг навбатчилик қисмларига топширилди.
Бу эса муассасалардаги ички тартибни таъминлаш, маҳкумлар хавфсизлигини назорат қилиш ва зарурат туғилганда тезкор хизмат кўрсатиш имкониятларини янада кенгайтирди.
Мазкур қадам тизимдаги ислоҳотларнинг амалий ифодаси сифатида, жазони ижро этиш муассасаларида хизмат олиб бораётган ходимларнинг иш шароитларини яхшилаш, уларни қўллаб-қувватлаш ва уларга бўлган эътиборни оширишда муҳим аҳамият касб этади.
ИИВ Жазони ижро этиш департаменти Ахборот хизмати