“Мард ўғлон” – жасорат ва садоқат рамзи. Ички ишлар сафидаги жасур ёш ходим – давлат мукофоти соҳибига айланди
2025-07-03 10:00:00 / Янгиликлар
Ёшларнинг илм-фан, хизмат, ижтимоий ҳаёт ва Ватанга садоқатли фаолияти доимо эътироф этилмоқда. Президентимиз томонидан 2025 йил 28 июнда имзоланган Фармон ва Қарорга мувофиқ, юртимизнинг ҳар томонлама юксалишига ҳисса қўшаётган, фидокор ва ташаббускор ёшлар “Келажак бунёдкори” медали ҳамда “Мард ўғлон” давлат мукофоти билан тақдирланди.
30 июнь – “Ёшлар куни” муносабати билан Тошкент шаҳридаги Халқаро конгресс марказида мазкур мукофотларни топшириш маросими бўлиб ўтди. Тантанали тадбирда мамлакатимиз келажаги бўлган юзлаб ёшлар, турли соҳаларда эришган ютуқлари билан эътироф этилди.
Энг қувонарлиси, мукофотланганлар орасида ички ишлар органлари вакили ҳам бор. Сурхондарё вилояти Ички ишлар бошқармаси тезкор вазифаларни бажарувчи сафарбар отряди ходими катта сержант Жандреев Шермуҳаммад Мамаражаб ўғли “Мард ўғлон” давлат мукофоти билан тақдирланди.
Бу мукофот –нафақат шахсан Ш.Жандреевнинг, балки ички ишлар тизимидаги минглаб ватанпарвар ёшларнинг меҳнати ва жасоратининг муносиб эътирофидир. Катта сержант Жандреев ўз хизмат фаолиятида интизом, садоқат ва матонатни намоён этиб, топширилган вазифаларни самарали ва виждонан бажариб келмоқда.
Сурхондарё вилояти ИИБ тизимида хизмат қилиб келаётган фидокор ва жасур йигитнинг юксак давлат мукофоти билан тақдирлангани ички ишлар органлари сафидаги ёшлар учун ҳам катта руҳий таянч ва мотивация манбаи бўлди. Бу эса, ёшларни ватанпарварлик руҳида тарбиялаш, хизматга бўлган садоқатни янада мустаҳкамлашда муҳим аҳамият касб этади.
Ички ишлар ходимларининг фидокорона хизмати, тинчлик ва осойишталикни таъминлашдаги ролини эътироф этиш барча юртдошларимизда фахр ва ғурур туйғусини уйғотади.
Бу каби мукофотлар эса, шубҳасиз, яна кўплаб ёшларни ҳалол ва садоқатли хизматга ундайди.