30 июнь – «Ёшлар куни» муносабати билан Ички ишлар вазирлигига қарашли 500 нафар ёш ходимлар ва ҳарбий хизматчилар иштирокида «Янги Ўзбекистон бунёдкорлари» мавзусида маънавий-маърифий тадбир ташкил этилди
2025-07-03 09:00:00 / Янгиликлар
Мазкур тадбир тизим тарихида илк маротаба «Ёшлар ижод саройи»да ўтказилиб, Президент ташаббуси билан ишлаб чиқилган, ёшларни илм-фан, креативлик ва замонавий технологияларни онлайн тарзда ўрганишга йўналтирувчи янги лойиҳалар тақдимоти билан ёдда қолди.
Тадбир Ўзбекистон Республикаси Давлат мадҳияси билан бошланиб, уни Вазирлик Маънавий-маърифий ишлар хизмати бошлиғи, полковник Хамза Махсумов кириш сўзи билан очиб берди.
У ўз нутқида ёшларга қаратилаётган давлат эътибори, тизимда олиб борилаётган ислоҳотлар ҳамда ёш кадрлар салоҳиятини ривожлантиришга қаратилган чора-тадбирлар ҳақида атрофлича маълумот берди.
Тадбир доирасида қуйидаги истиқболли лойиҳаларнинг тақдимоти бўлиб ўтди:
«Mutolaa» – китобхонлик маданиятини юксалтиришга хизмат қилувчи лойиҳа;
«Ибрат фарзандлари» – хорижий тилларни чуқур ўргатишга ихтисослашган ташаббус;
«Qizlar akademiyasi» – ёш хотин-қизларни жамиятда ўз ўрнини топишга йўналтирувчи дастур;
«Ustoz AI» – замонавий касблар ва сунъий интеллект асосида билим берувчи инновацион лойиҳа.
Тадбир давомида жиноятчилик ва ҳуқуқбузарликлар профилактикасига оид илғор хорижий тажрибалар, уларни мамлакатимизда қўллаш имкониятлари юзасидан ҳам маърузалар ўқилди. Ушбу амалий машғулотлар ёш ходимларга ўзларини қизиқтирган саволлар билан мутахассисларга мурожаат қилиш, фикр ва таклифларини билдириш имконини берди.
Ёшлар ишлари агентлиги томонидан тадбир иштирокчиларига 100 дона «Premium» версиядаги имтиёзли онлайн таълим лойиҳалари учун ваучерлар топширилди.
Тадбир якунида эса Вазирлик Ашула ва рақс ансамблининг истеъдодли хонандаси Нурали Шукруллаев томонидан Ватанни мадҳ этувчи куй-қўшиқлар ижро этилиб, иштирокчиларга юқори кайфият улашилди.
Мазкур тадбир ёш ходимлар қалбида фахр, масъулият ва интилишга илҳом бағишлади.