Ички ишлар органлари психологлари учун янги босқич: Полиграф қурилмаси бўйича малака ошириш курслари ўтказилди
2025-06-25 17:20:00 / Янгиликлар
Ўзбекистон Республикаси Президентининг 2023 йил 20 январдаги ПҚ–10-сонли “Ички ишлар органларини халқчил профессионал тузилмага айлантириш ва аҳоли билан янада яқин ҳамкорликда ишлашга йўналтириш бўйича қўшимча чора-тадбирлар тўғрисида”ги қарори ижросини таъминлаш мақсадида яна бир муҳим қадам ташланди.
Ички ишлар органлари тизимидаги мутахассис-психологлар малакасини ошириш, уларнинг замонавий психофизиологик воситалардан, хусусан, “Полиграф” қурилмасидан фойдаланиш кўникмаларини ривожлантириш мақсадида махсус ўқув курслари ташкил этилди.
Мазкур ўқув курсининг биринчи босқичи 2025 йил 7 апрелдан, иккинчи босқичи эса 9 июндан бошлаб Ички ишлар вазирлиги Академияси базасида йўлга қўйилди. Ўқув курсларида Ички ишлар вазирлиги таркибий тузилмалари ва ҳудудий ички ишлар органларининг Маънавий-маърифий ишлар бўлинмаларида фаолият юритаётган мутахассис-психологлар иштирок этди.
Ўқув дастурлари асосида тингловчиларга “Полиграф” аппарати ёрдамида махсус психофизиологик текширувларни ўтказиш бўйича зарурий назарий билимлар ва амалий кўникмалар берилмоқда. Бу жараёнда ҳуқуқни муҳофаза қилувчи бошқа ташкилотлардан ҳам малакали мутахассислар жалб этилган бўлиб, ўзаро тажриба алмашинуви таъминланди.
Мутахассислар рўйхати, ўқув дастурлари, ҳамкор ташкилотлар вакиллари ҳамда курс иштирокчиларидан олинадиган тилхатлар тегишли иловаларга мувофиқ тарзда ҳужжатлаштирилган.
Махсус ўқув курси якунида барча тингловчилар махсус синовлардан ўтказилди. Синовлардан муваффақиятли ўтган мутахассисларга эса 3 йил давомида амал қилувчи сертификатлар топширилди. Бу эса уларнинг профессионал фаолиятида ишончли восита сифатида хизмат қилади.
Ушбу ташаббус Ички ишлар органлари фаолиятида психологик таҳлил ва экспертиза даражасини янги босқичга олиб чиқиши, шунингдек, фуқаролар билан ишлашда очиқлик, адолат ва ишонч муҳитини мустаҳкамлашга хизмат қилиши шубҳасиз.