Ўзбекистон Республикаси Ички ишлар вазирлиги

Давлатимиз раҳбари ташаббуси билан жорий этилган сайёр қабуллар тизими аҳолининг талаб ва эҳтиёжларини қондириш, жойларда ижтимоий-иқтисодий муҳитни янада яхшилашга хизмат қилмоқда.

Пойтахтимиз аҳолиси учун ташкиллаштирилган навбатдаги сайёр қабул Сергели туманида жойлашган “Болалар кутубхонаси” биносида бўлиб ўтди.

Сергели ва Янгиҳаёт туманлари аҳолисини мурожаатларини ўрганиш мақсадида ташкил этилган сайёр қабулда пойтахт ИИББ бошлиғи полковник Равшан Султанходжаев ҳамда бошқа мутасадди ташкилотлар раҳбарлари ҳам иштирок этишди.

Сайёр қабул давомида жами 38 нафар фуқароларнинг муаммолари ўрганилди.

Улардан 12 таси суриштирув ва тергов ҳаракатлари юзасидан, 4 таси мол-мулк масаласида, 5 таси ички ишлар органларига хизматга қабул қилиш, хизматни ўташ ва қайта тиклаш юзасидан, 3 таси оила турмуш доирасида келишмовчилик, 8 таси пробация ҳисобида турган шахсларни муддатидан илгари шартли озод қилиш масаласида ҳамда 6 таси ижтимоий масалада моддий ёрдам бўйича мурожаат қилдилар.

Мурожаатларнинг 9 таси жойида ижобий ҳал этилди, 3 таси бўйича тушунтириш берилиб, кўриб чиқиш қўшимча муддат талаб этадиган 26 та мурожаатларнинг ижроси назоратга олинди.

Сайёр қабул давомида фуқаро З.Сайдалиева яшаш хонадонида ёнғин бўлганлиги сабабли, уйини таъмирлаб беришда амалий ёрдам сўради. Ушбу мурожаат юзасидан, Сергели тумани ИИО ФМБ масъуллари томонидан фуқаронинг уйини таъмирлаб беришда амалий ёрдам кўрсатилиши белгиланди.

Шунингдек, пойтахтимизнинг Сергели ва Янгиҳаёт туманлари ИИО ФМБ Пробация хизмати ҳисобида турган жами 8 нафар фуқаролар Жиноят кодексининг 73-моддасига асосан жазони ўташдан муддатидан илгари шартли озод қилинди.

Бу каби сайёр қабуллар аҳоли ва давлат органлари ўртасида очиқ мулоқотни таъминлаш, муаммоларни кечиктирмасдан ҳал этишда муҳим қадам ҳисобланади.

Ушбу тадбирлар фуқароларнинг давлат идораларига бўлган ишончини ошириш, жамиятда самарали ижтимоий шерикликни ривожлантиришга хизмат қилади.

Тошкент шаҳар ИИББ Ахборот хизмати