Ёшлар ойлиги доирасида ИИВ Қоровул қўшинлари ҳарбий хизматчилари Тошкент, Наманган, Навоий ва Зарафшон шаҳарларида ўтказилган тадбирларда фаол иштирок этишди
2025-06-13 09:40:00 / Янгиликлар
Ёшлар ойлиги доирасида, даставвал, Тошкент шаҳрида жойлашган қўшинга қарашли 7531 ҳарбий қисм бир гуруҳ ҳарбий хизматчилари пойтахтимиздаги Адиблар хиёбонига ташриф буюриб, миллий адабиётимиз ривожига ҳисса қўшган ёзувчи ҳамда шоирлар ҳаёти ва ижоди билан яқиндан танишишди. Шундан сўнг, Тошкент Давлат Транспорт Университетида бўлиб, ташкил этилган давра суҳбатида талабаларга замонавий армия ҳаёти, соҳанинг ижтимоий ва стратегик аҳамияти борасида сўзлаб, олий ўқув юртидаги мавжуд музей фаолияти билан бевосита танишишди.
Навоий шаҳридаги 7532 ҳарбий қисмда эса ўқувчи ёшлар учун «Командир ва Ёшлар» учрашуви ташкил этилиб, унда ҳарбий хизматчилар ўз ҳаётий тажрибалари, ҳарбий хизматнинг ўрни ва аҳамияти, хизмат вақтидаги синовли, қизиқарли ва эсда қоларли воқеалар ҳақида сўзлаб беришди.
Бу каби учрашувлар Зарафшон шаҳридаги 7551 ва Наманган вилоятидаги 7552 ҳарбий қисм ҳарбий хизматчилари билан ҳам ҳудудлардаги умумтаълим мактабларида давом эттирилди. Унда, ҳарбий хизматчилар ва ёшлар ўртасида мазмунли ва мароқли суҳбатлар ташкил этилиб, маданий-маърифий кўнгилочар дастурлар ва спорт ўйинлари кўтаринки руҳда ўтказилган бўлса, ватанпарварликни тарғиб қилувчи видеороликлар намойиши эса барчада қизиқиш уйғотди.
Шу ўринда, бу тадбирлар ёшларга оид давлат сиёсатини амалга ошириш, ҳарбий хизматчилар ва ёшлар орасида соғлом маънавий муҳитни шакллантириш, уларнинг жамиятда ижтимоий фаоллигини ошириш ҳамда уларни ватанга садоқат руҳида тарбиялашда муҳимлигини таъкидлаш жоиздир.
Ёшлар ойлиги доирасидаги тадбирлар қўшиндаги барча ҳарбий қисм ва бўлинмаларда фаол тарзда давом этмоқда.
ИИВ Қоровул қўшинлари қўмондонлиги Ахборот гуруҳи