Ўзбекистон Республикаси Ички ишлар вазирлиги

Жиноятчиликка қарши курашиш, аҳолининг ҳуқуқий хавфсизлигини таъминлаш, жамоатчилик билан ўзаро мулоқотни кучайтириш борасида жойларда амалга оширилаётган ишлар тизимли таҳлил қилинмоқда.

Жумладан, Наманган вилояти Ички ишлар бошқармаси ва Ўзбекистон Республикаси Миллий гвардияси вилоят бошқармаси раҳбарияти Поп туманининг «Ғурумсарой» маҳалласида бўлиб, ҳудуддаги криминоген вазият атрофлича муҳокама қилинди.

Ўрганишлар давомида, маҳалла еттилиги ва ҳудудга бириктирилган масъул ходимларнинг ўзаро ҳамкорлиги тўғри ташкил этилмаганлиги, аҳоли муаммолари ўрганилмаганлиги, низоли оилалар билан манзилли ишлар ташкил этилмаганлиги натижасида оғир ва ўта оғир турдаги жиноятларнинг содир этилганлиги кескин танқид қилинди.

Масъул раҳбарлар томонидан жиноятчиликка қарши курашда профилактика ишларини кучайтириш, ҳар бир маҳаллада хавфсиз муҳитни шакллантириш, аҳоли билан доимий мулоқотда бўлиб, уларнинг дарду ташвишларини ўрганиш ва ҳал этиш юзасидан аниқ вазифалар ва топшириқлар белгилаб берилди.

Йиғилиш якунида ҳар бир масъул ходимдан маҳалла фуқаролари билан яқин ҳамкорликда ишлаш, жиноятлар ва ҳуқуқбузарликларнинг олдини олишга қаратилган аниқ чора-тадбирларни ишлаб чиқиш, аҳолининг ҳуқуқий маданиятини ошириш бўйича кенг қамровли ишларни амалга оширилиши қайд этилди.

Шу билан бирга, маҳалла еттилиги аъзоларига профилактика инспекторлари билан яқин алоқада бўлиб, ҳар бир хонадон, ҳар бир оиланинг ички муҳити ва эҳтиёжларини ўрганиш, профилактик суҳбатлар ташкил қилиш ҳамда ёшлар ўртасида ҳуқуқбузарликларнинг олдини олишга қаратилган маънавий-маърифий тадбирларни кенг йўлга қўйиш бўйича кўрсатмалар берилди.

Бу каби таҳлилий учрашувлар вилоятнинг барча туман ва шаҳарларида босқичма-босқич ўтказилиши белгиланган бўлиб, улар орқали ҳар бир ҳудуддаги ҳақиқий ҳолати, мавжуд муаммолар ва ечимлар аниқланади, фуқароларнинг хавфсизлиги таъминланишидаги масъулияти янада кучайтирилади.

Наманган вилояти ИИБ Ахборот хизмати