Ишчи гуруҳ фаолиятидан. Олис ҳудуд муаммолари ҳал этилмоқда
2025-05-31 23:00:00 / Янгиликлар
Турли соҳа мутасаддиларидан иборат республика ишчи гуруҳининг навбатдаги сайёр қабули Зарафшон шаҳрида ташкил этилди. Олис ҳудудлар аҳолисининг муаммоларини ўрганиш, уларга амалий ёрдам кўрсатиш мақсадида бўлиб ўтган мазкур қабулда Зарафшон шаҳри, Учқудуқ ва Томди туманлари фуқаролари қатнашди.
Қабул жараёнида аҳолининг ҳуқуқий, ижтимоий ва иқтисодий масалаларга оид мурожаатлари ўрганилди. Жумладан, ИИВ масъуллари ҳамда вилоят ИИБ бошлиғи томонидан фуқаролик масалалари, низоли ҳолатлар, ер ва мулкка оид шикоятлар тингланиб, айримлари жойида ҳал этилди.
Мая Усмонова Зарафшон шаҳри «Қурувчи» маҳалласида истиқомат қилади. Аёлнинг бугун 32 йиллик орзуси ушалди — унга Ўзбекистон Республикаси фуқаролигига қабул қилинганлиги ҳақидаги ҳужжат топширилди.
Фуқароликнинг йўқлиги менинг айрим ҳуқуқларимни чекларди. Аммо кўп миллатли Зарафшон халқининг меҳмондўстлиги, очиқкўнгиллиги бизни шу ерда узоқ йиллар истиқомат қилишимизга сабабчи бўлди. Мана, энди мен ҳам Ўзбекистон Республикаси фуқаросиман, — дейди фахр билан Мая Усмонова.
Шунингдек, қабул жараёнида 16 ёшга тўлган зарафшонлик? нафар ўғил-қизга Ўзбекистон Республикаси шахс гувоҳномаси — ID карталари топширилди.
Бундан ташқари, сайёр қабул доирасида мурожаатчиларнинг аксар долзарб ижтимоий муаммоларига жойида ечим топилди, баъзиларига ҳуқуқий ёрдам кўрсатилди.
Бу каби тадбирлар халқнинг давлат органларига ишончи ортишига хизмат қилиши шубҳасиз.
©️ “Postda” газетаси, Маҳлиё Холова, Навоий вилояти.