Ўзбекистон Республикаси Ички ишлар вазирлиги

Сирдарё вилоятида жиноятчилик ва ҳуқуқбузарликларнинг олдини олиш, аҳоли ўртасида ҳуқуқий онг ва ҳуқуқий маданиятни ошириш мақсадида жорий ҳафтанинг пайшанба куни “Профилактика куни” доирасида кенг қамровли комплекс тадбирлар ташкил этилди.

Тадбир вилоят прокурори ва Сирдарё вилояти Ички ишлар бошқармаси бошлиғи раҳбарлигида ўтказилган кенгайтирилган йиғилиш билан бошланди. Йиғилишда жорий йилнинг ўтган давридаги жиноятчилик ҳолати таҳлил қилиниб, жамиятда хавфсизликни таъминлашга қаратилган чора-тадбирларнинг самарадорлигини ошириш юзасидан аниқ вазифалар белгилаб олинди.

Профилактика куни доирасида маъмурий ҳуқуқбузарлик содир этган шахсларнинг қилмишлари сайёр судларда кўриб чиқилди. Бундан ташқари вилоятнинг барча туман ва шаҳарларида профилактика инспекторлари томонидан маҳаллаларда “уйма-уй” юришлар ташкил этилди. Жиноят содир этишга мойил шахслар, профилактик рўйхатда турган фуқаролар, муҳтож оилалар ҳолати ўрганилиб, улар билан манзилли суҳбатлар олиб борилди. Шунингдек, ҳуқуқбузарликларга мойил бўлган ёшлар билан психологик ва ҳуқуқий маслаҳатлар ташкил этилди.

Хотин-қизлар масалалари бўйича масъул инспекторлар томонидан зўравонликдан жабр кўрган аёллар, низоли оилалар, ёлғиз оналар ҳолати ўрганилди. Уларга ҳуқуқий ёрдам, психологик қўллаб-қувватлаш ва заруратга қараб иш билан таъминлаш бўйича тавсиялар берилди. Маҳалла ва таълим муассасаларида қизлар билан “Оила муқаддаслиги”, “Зўравонликка йўл қўймайлик” мавзуларида учрашувлар ташкил этилди.

Йўл ҳаракати хавфсизлиги бошқармаси ходимлари томонидан аҳоли гавжум жойлар ва таълим муассасалари атрофида йўл ҳаракати қоидаларига риоя этилиши юзасидан рейдлар ўтказилди. Ҳайдовчилар ва пиёдаларга қоидалар тўғрисида тушунтиришлар берилди. Болаларни махсус ўриндиқларда ташиш, светофор ва зебрадан тўғри ўтиш бўйича амалий кўргазмалар ташкил этилди.

Жамоат тартибини сақлаш бошқармаси ходимлари томонидан бозорлар, кўнгилочар масканлар ва жамоат жойларида назорат кучайтирилди. Тинчлик ва хавфсизликни таъминлаш мақсадида рейдлар ташкил этилди. Ёшлар йиғиладиган жойлар, кафелар ҳамда боғлар алоҳида назоратга олинди.

Қўриқлаш хизмати ходимлари томонидан маҳаллаларда хонадонларни техник воситалар орқали қўриқловга улаш юзасидан тарғибот ишлари олиб борилди. Фуқароларга сигнализация ва видео кузатув воситаларини ўрнатишнинг афзалликлари тушунтирилди.

Профилактика куни доирасида Пробация хизмати ходимлари ҳам фаол иштирок этди. Назоратда турган шахслар ҳолати ўрганилиб, улар билан якка тартибдаги иш олиб борилди. Жойларда сайёр судлар ўтказилди.

Хулоса ўрнида айтиш мумкинки, Сирдарё вилоятида “Пайшанба – профилактика куни” фақатгина якка чора-тадбир эмас, балки аҳоли билан самарали мулоқот, жиноятчиликка қарши кенг қамровли ҳаракатлар тизимининг муҳим бир бўғини ҳисобланади. Бундай ташаббуслар орқали жамиятда тинчлик ва хавфсизликни таъминлашга қаратилган ишлар изчил давом эттирилмоқда.

Сирдарё вилояти ИИБ Ахборот хизмати