Ёш ходимлар қонунчилик жараёни билан яқиндан танишдилар
2025-05-20 06:35:00 / Янгиликлар
Ўзбекистон Республикаси Ички ишлар вазирлиги тизимида хизмат олиб бораётган ёш ходимлар Ўзбекистон Республикаси Олий Мажлиси Қонунчилик палатасига ташриф буюришди. Ташриф давомида улар қонунчилик палатаси фаолияти, қонунлар ишлаб чиқилиши ва қабул қилиниш жараёнлари билан яқиндан танишдилар.
Мазкур ташрифнинг асосий мақсади — ёш ходимларнинг ҳуқуқий билимларини ошириш, уларни қонунчилик жараёнига жалб этиш орқали юксак ҳуқуқий маданиятни шакллантиришдан иборат бўлди. Қонунчилик палатаси депутатлари билан бўлиб ўтган учрашувда иштирокчилар қонун лойиҳаларини тайёрлаш, муҳокама қилиш ва қабул қилиш босқичлари ҳақида батафсил маълумот олишди.
Шунингдек, учрашув давомида депутатлар ички ишлар органлари ва қонунчилик ўртасидаги ҳамкорлик, ёш кадрларнинг ҳуқуқий онгини юксалтириш борасидаги ташаббуслар ҳақида сўз юритдилар. Ёш ходимлар эса ўзларини қизиқтирган саволлар билан мурожаат қилиб, қонунчилик фаолиятига бўлган қизиқишларини намоён этдилар.
Ташриф иштирокчиларида катта таассурот қолдирди. Улар бу каби учрашувлар нафақат билим доирасини кенгайтириши, балки ўз касбий фаолиятларида қонунчиликка янада чуқурроқ ёндашишларига хизмат қилишини таъкидлашди.
Шубҳасиз, бундай ташаббуслар ёш ходимларнинг касбий маҳоратини ошириш ва улар орасида ватанпарварлик, қонунга ҳурмат туйғуларини мустаҳкамлашда муҳим ўрин тутади.