Бухоро вилояти ИИБ раҳбарияти томонидан Ғиждувон туманида олиб борилаётган профилактик тадбирлар ўрганилди
2025-05-14 12:35:00 / Янгиликлар
Бухоро вилояти ИИБ раҳбарияти Ўзбекистон Республикаси Президентининг 2025 йил 3 январь куни қабул қилинган ПҚ-1-сонли қарори ижроси доирасида криминоген вазияти оғир деб баҳоланган Ғиждувон туманида амалга оширилаётган ишлар билан танишди.
Текширув жараёнида маҳаллаларда жиноятчиликни олдини олиш, “Обод ва хавфсиз маҳалла“ тамойили асосида профилактик тадбирлар самарадорлиги, мавжуд муаммо ва камчиликлар муҳокама қилинди. Шунингдек, тунги вақтда фаолият юритаётган жамоат жойлари, патрул йўналишлари, йўл ҳаракати хавфсизлиги бўйича ишлар ҳам ўрганилди.
Ўрганиш натижаларига кўра, ҳуқуқбузарликларнинг олдини олиш, мавжуд муаммоларни бартараф этиш бўйича чоралар белгилаб олинди. Туман ҳокимлигида ўтказилган тезкор йиғилишда ишчи гуруҳнинг олдинги топшириқлари ижроси ва жиноятчиликнинг сабаблари таҳлил қилинди.
Шунингдек, “Хавфсиз ва соғлом юрт“ ҳамда “Қорадори–2025” профилактик тадбирлари доирасида амалга оширилган ишлар кўриб чиқилди. Натижаларга қараб, хизматини яхши бажарган ходимлар рағбатлантирилди, камчиликка йўл қўйганларга интизомий чоралар қўлланилди.
Текширув якунида аниқланган муаммолар бўйича масъулларга манзилли топшириқлар берилди ва уларнинг ижроси қатъий назоратга олинди. Бундай ўрганишлар вилоятнинг бошқа ҳудудларида ҳам давом эттирилади.
Бухоро вилояти ИИБ Ахборот хизмати