Қашқадарё вилояти ИИБ раҳбарияти томонидан “Хавфсиз ва соғлом юрт” тадбири доирасида Нишон ва Миришкор туманларида амалга оширилган ишлар танқидий-таҳлил этилди
2025-05-09 09:00:00 / Янгиликлар
Қашқадарё вилоят ИИБ бошлиғи полковник Абдувохид Исмоилов “Хавфсиз ва соғлом юрт” кенг қамровли тезкор-профилактик тадбири доирасида Нишон ва Миришкор туманларида амалга оширилган ишларни танқидий-таҳлил этди.
Хусусан, ҳар икки туманда криминоген вазиятни жиловлаш, жиноятларни олдини олиш ва фош этиш, гиёҳвандлик ва шу каби иллатларга қарши кураш, тинчлик ва осойишталикни таъминлаш, ижтимоий профилактикани кучайтириш, назоратдаги ҳамда жиноят содир этишга мойил шахслар билан манзилли ишлар олиб бориш каби йўналишлардаги натижалар муҳокама қилинди.
Шунингдек, маҳаллаларда хавфсиз муҳитни яратиш, жамоат тартибини сақлаш, хавфсизликни таъминлаш ва криминоген вазиятни барқарорлаштириш борасида ички ишлар органлари ходимлари фаолияти таҳлил этилиб, масъул ходимлар зиммасига аниқ вазифалар юкланиб, масъуллар огоҳлантирилди.
Амалга оширилган ишларни таҳлил этиб, бу йўналишдаги тадбирларни янада кучайтириш, осуда турмушга замин ҳозирлаш учун фуқаролар гавжум тўпланадиган жойлар, бозорлар, чойхоналар савдо дўконларига видеокамералар ўрнатиш ишларини жадаллаштириш, ишчанлик ҳолатини текшириш, жараёнда кенг жамоатчилик, айниқса, маҳаллий ҳокимликлар, корхона ва ташкилотларнинг маҳалла еттилиги билан ҳамкорликни янада кучайтириш лозимлигини юзасидан манзилли топшириқлар берилди.
Қашқадарё вилояти ИИБ Ахборот хизмати