Ҳалолликни шиор қилган ходимлар. “Саёқ еган таёқ”
2024-01-29 13:55:00 / Янгиликлар
Тилимизда “Саёқ юрган таёқ ейди” мақоли бежиз яралмаган. Воҳиджон (исмлар ўзгартирилди) оиланинг кенжаси бўлгани учунми, кўнглига келганидан қайтмай “таёқ еб” турадиганлар хилидан.
Ўша куни ҳам алламаҳалда меҳмонга келган акаси Нодирнинг машинасида сайр қилгиси келиб қолди. Камига, қўшниси Баҳромни ҳам шерик қилди. Икковлон, ўзларининг тили билан айтганда, “тойчоқнинг учишига маст бўлиб”, ярим тунда кўча кезди. Бу хурмача қилиқ ортидан “таёқ” нафақат унга, балки укасининг айбини яширишга уринган Нодирга ҳам тегди.
2024 йил 7 январь куни соат тахминан 22 ларда хизмат ҳудудим бўлган “Ражабамин” МФЙнинг “Чумчуқли” маҳалласида тунги хизмат олиб бораётган вақтимда йўл четида турган “Нексия-2» русумли автомашинасидаги йигитларнинг ҳаракатлари шубҳали кўринди. Шу сабабли, уларнинг олдига бордим, дейди Самарқанд тумани ИИБ ЖХХ ҲПБ профилактика инспектори, лейтенант Жаҳонгир Тоиров. Ҳайдовчидан шахсини тасдиқловчи ҳамда автомашина ҳужжатларини ва нима мақсадда юрганлигини сўрадим. У ёнида ҳеч қандай ҳужжатлари йўқлигини, автомашинани ҳужжатларсиз бошқаргани, ўз ишлари билан юрганлигини маълум қилди. Шундан кейин автомашинани “Чумчуқли” маҳалласидаги жарима майдонига жойлаштириб, унинг шахсига ойдинлик киритдим.
Эртасига соат 15:00ларда лейтенант Ж. Тоиров ўзига бириктирилган ҳудудда хизмат олиб бораётган вақтида унинг олдига ўзини Воҳиджоннинг акасиман, деб таништирган Нодир келиб, укасига нисбатан чора кўрмаслик, тўпланган ҳужжатларни ЙҲХБга ўтказмаслик ҳамда автомашинасини жарима майдонидан чиқариб бериш эвазига бир миллион сўм миқдоридаги пулларни пора сифатида таклиф қилади.
Ўтказилган тезкор тадбир натижасида ҳуқуқбузарликка қўл урган Нодир ваъда қилган пулларини бераётган вақтида қўлга олинди.
Соҳада ўрганадиган билим ва кўникмаларим кўп, дейди Ж. Тоиров. Хизматда устозларим профилактика инспекторлари капитан Мунис Алимамажонов, катта лейтенант Мансур Ҳомидовдан тизимнинг ўзига хос томонларини ўзлаштиришга ҳаракат қиламан. Отам, истеъфодаги катта сержант Дамир Исроилов ҳам узоқ йиллар ички ишлар органларида самарали меҳнат қилган. У эгнимга илк бор хизмат либосини кийганимда, “Бу кийимнинг масъулиятини англаб, фидойилик, жонкуярлик, соф виждон ва ҳалоллик билан хизмат қилсанг, у сенга шараф келтиради. Бу менинг сенга ҳам оталик, ҳам шу соҳада ишлаган бир инсон сифатидаги маслаҳатим”, деган. Ниятим шу соҳада ибратли хизмат қилиб, халқимга, юртимга муносиб фарзанд бўлиш, отам ва устозларим ишончини оқлаш.
Орамизда ёшлик шижоатига тўла қалбида касбига муҳаббати, садоқати билан нурли истиқбол сари дадил одимлаётган лейтенант Жаҳонгир Тоиров каби ходимлар бор экан, ҳар бир ноқонуний ҳаракатга ҳуқуқий баҳо берилишига ишончимиз комил.
Гулноза ТУРҒУНБОЕВА, ўз мухбиримиз. “Постда”
Самарқанд вилояти