Ёшлар ўртасида ватанпарварлик, қонунларга ҳурмат ва соғлом турмуш тарзини шакллантириш мақсадида Ички ишлар вазирлигига бириктирилган мактаб ўқувчилари иштирокида қатор тарбиявий ва спорт тадбирлари ташкил этилди
2025-05-05 16:00:00 / Янгиликлар
Тадбир доирасида мамлакатимизнинг барча ҳудудларидан ташриф буюрган 112 нафар ўқувчи Ички ишлар вазирлиги Академиясидаги “Очиқ эшиклар куни”да иштирок этишди.
Улар Академия курсантларининг ҳаёти, ўқув жараёни, жисмоний ва жанговар тайёргарлик жараёнлари, мавжуд инфратузилмалар ҳамда маънавий-маърифий ишлар билан яқиндан танишдилар.
Шунингдек, ўқувчилар Ахборот-ресурс маркази, Чўлпон музейи, “Ватанпарварлик бурчаги”, Коррупцияга қарши кураш бурчаги каби муҳим объектлар фаолияти билан ҳам танишиб чиқишди.
Ташрифнинг иккинчи кунида иштирокчилар Ички ишлар органлари тарихи музейига боришди.
У ерда уларга ички ишлар органларининг юртимиз осойишталигини таъминлашдаги ўрни, жиноятчиликка қарши курашишдаги саъй-ҳаракатлари ва ушбу йўналишда хизмат кўрсатган фидоий ходимлар ҳақида батафсил маълумот берилди.
Тадбир доирасида спортнинг волейбол тури бўйича мусобақа ҳам ташкил этилди. Қизғин ва муросасиз кечган финал ўйинида Қорақалпоғистон Республикаси жамоаси Қашқадарё вилояти жамоасини мағлуб этиб, ғолибликни қўлга киритди. Учинчи ўринга эса Навоий вилояти жамоаси сазовор бўлди.
Ғолибларга диплом, медал, кубок ва қимматбаҳо совғалар топширилди. Шунингдек, бир қатор номинациялар бўйича ҳам фаол ўқувчилар алоҳида тақдирланди.
Бундай ташаббуслар ёш авлоднинг ҳуқуқ-тартибот органларига бўлган қизиқишини ошириш, уларда юртга муҳаббат ва масъулият туйғусини тарбиялашда муҳим аҳамият касб этади.