Наманганда “қизил” тоифадаги маҳаллалар ўрганилмоқда
2025-04-29 13:10:00 / Янгиликлар
Наманган вилоятида жиноятчиликнинг олдини олиш, жамоат хавфсизлигини таъминлаш ва аҳоли фаровонлигини ошириш мақсадида ички ишлар органлари томонидан тизимли ишлар амалга оширилмоқда. Жорий йилнинг биринчи чораги якунига кўра “қизил” тоифага киритилган маҳаллалардаги мавжуд ҳолатни ўрганиш, камчиликларни бартараф этиш ва самарали чора-тадбирлар белгилаш мақсадида Ички ишлар бошқармаси раҳбарияти бошчилигида ишчи гуруҳ шакллантирилди.
Ушбу ишчи гуруҳ Наманган шаҳридаги 4-сонли “Ҳуқуқ-тартибот маскани“ ҳамда “Шарқ тонги“, “Чорсу“ ва “Бобуршоҳ“ маҳаллаларида бўлиб, жиноят ҳолатларини таҳлил қилди. Шунингдек, Давлатобод туманидаги “Янги Тонг“, “Халқлар дўстлиги“ ва Тўрақўрғон туманидаги “Исвахон“ маҳаллаларида ҳам ўрганиш ишлари олиб борилди.
Таҳлиллар жараёнида ушбу маҳаллаларнинг “қизил” тоифага киритилишига турли омиллар сабаб бўлгани аниқланди. Жумладан, маҳалла еттиликлари ва ҳудудларга бириктирилган масъул ходимлар томонидан манзилли чора-тадбирлар белгиланмагани, ПҚ-1-сонли Қарор асосида етарлича профилактик фаолият амалга оширилмагани таъкидланди ва бу ҳолат кескин танқид қилинди.
Масъулларга жиноятчиликка қарши курашни кучайтириш, “маҳаллабай” ва “хонадонбай” усулида ишлашни ташкил этиш, аҳоли билан доимий мулоқотда бўлиб, уларнинг муаммоларини ўрганиш, хизмат кўрсатувчи объектлар ҳамда хонадонларни қўриқлашга олиш, жамоат жойларига “ташвиш тугмалари“ни ўрнатиш бўйича аниқ вазифалар юклатилди.
Шу тариқа, вилоятда хавфсиз ва барқарор муҳитни шакллантириш, жиноятларнинг олдини олиш ва ҳуқуқбузарликка қарши курашни янада самарали ташкил этиш мақсадида амалий ишлар изчил давом эттирилмоқда.
Наманган вилояти ИИБ Ахборот хизмати