Фахрийлар ва ёшлар учрашуви
2024-01-13 09:00:00 / Янгиликлар
Қуролли Кучларимиз ташкил топганининг 32 йиллиги ва 14 январь – Ватан ҳимоячилари куни муносабати билан Қуролли кучлар ва ИИВ тизимларидан истеъфога чиққан фахрийларининг Ички ишлар вазирлиги Малака ошириш институтида бошланғич тайёргарлик ўқув курслари тингловчилари билан давра суҳбати бўлиб ўтди.
Унда Ўзбекистон Қуролли можаролар ва антитеррористик кураш ногирон-фахрийларининг “Ватан” хайрия жамоат фонди раиси Абдуманнопов Абдурахим Мадрахимович, жамоат фонди аъзолари, нафақадаги полковник Шейко Алексей Алексеевич, полковник Джумагулов Турсун Турғунович, полковник Абдуллаев Рашид Игамбердиевич ва профессор-ўқитувчилар, тингловчилар иштирок этди.
Тадбирда сўзга чиққанлар, кекса авлод вакилларига ҳурмат ва эҳтиром кўрсатиш миллий қадриятларимиздан эканини таъкидлаб, уларнинг узоқ йиллик самарали хизматлари давомида орттирган тажрибалари, жасорати ва фидойилиги ўсиб келаётган ёш авлод тарбиясида алоҳида ўрин тутишини, ибратли ҳаёт йўллари эса ёшларда ғайрат-шижоатни, элу юртидан ғурурланиш туйғусини кучайтиришга хизмат қилишини таъкидлади.
Учрашувда мустақиллик, тинчлик халқимизнинг бебаҳо бойлиги экани, мамлакатимизда барча соҳаларда олиб борилаётган изчил ислоҳотлар замирида ана шу неъматларни кўз қорачиғидай асраб-авайлаш масъулияти мужассамлиги, ёшларимизни Ватанга садоқат ва миллий қадриятларимизга ҳурмат руҳида тарбиялашнинг аҳамияти хусусида сўз юритилди.
Фахрийлар тингловчиларга ўзларининг хизмат йўли, қатнашган жанговар ҳаракатлари ва бу ҳаракатларда уларга нималар ёрдам берганлиги тўғрисида гапириб берди. Бугун таҳсил олаётган ёшлар институт профессор-ўқитувчилари томонидан берилаётган билимларни ўзлаштиришлари, амалий машғулотлар, шу жумладан, жанговар ва жисмоний тайёргарликка алоҳида эътибор бериш, ўз устиларида тинимсиз ишлашлари, “устоз-шогирд” анъанасига амал қилиш, уларнинг орттирган тажрибаларидан унумли фойдаланиш зарурлигини таъкидлаб ўтдилар.
Фахрийлар тингловчиларнинг қизиқтирган саволларига атрофлича жавоблар қайтарди.
ИИВ Малака ошириш институти