“Маънавият ойлиги“ доирасида – Ислом Каримов номидаги мемориал мажмуага ташриф
2025-04-24 13:00:00 / Янгиликлар
Ички ишлар вазирлиги томонидан мамлакатимизда жорий йил 1 апрелдан 30 апрелгача “Халқимизнинг хавфсизлиги, тинчлиги ва осойишталигини сақлаш – энг устувор вазифамиз!” шиори остида “Маънавият ойлиги” ўтказилмоқда. Ушбу ойлик доирасида ички ишлар органларининг таркибий тузилмалари ва ҳудудий бўлинмаларида қатор маънавий-маърифий тадбирлар амалга оширилмоқда.
Ойлик доирасида ҳар бир ҳудуд учун махсус тасдиқланган “Маънавият маршрути” лойиҳаси асосида ички ишлар органлари ходимларининг маданият объектлари, музейлар ва зиёратгоҳларга ташрифи ташкил этилмоқда.
Бу ташрифлар орқали ходимларнинг маънавий дунёқарашини бойитиш, миллий ва тарихий меросимизга бўлган ҳурматни янада ошириш мақсад қилинган.
Шу муносабат билан, жорий йилнинг 17 апрель куни Ички ишлар вазирлиги марказий аппарати ходимлари Тошкент шаҳрида жойлашган Ислом Каримов номидаги Илмий-маърифий мемориал мажмуасига ташриф буюрдилар.
Ташриф давомида улар мустақил Ўзбекистон асосчиси ва биринчи Президенти Ислом Каримовнинг бой илмий, сиёсий ва маънавий мероси билан танишдилар.
Мажмуадаги экспонатлар, фотосуратлар ва ҳужжатлар орқали мамлакатимиз тарихи, истиқлол йўлида босиб ўтилган муҳим босқичлар ва эришилган ютуқлар ҳақида кенг маълумотларга эга бўлдилар.
Шунингдек, ходимлар мамлакат тараққиёти ва тинчлигини сақлашда маънавият ва ахлоқнинг ўрни беқиёс эканини яна бир бор англадилар.
Бундай ташрифлар ходимларнинг маънавий камолотига хизмат қилиш билан бирга, уларни ўз касбий бурчига янада масъулият билан ёндашишга даъват этади.
“Маънавият ойлиги” доирасидаги бундай тадбирлар келгусида ҳам изчил давом эттирилиши режалаштирилган.