Янги йил бошланиши муносабати билан соҳа вакилларига устувор вазифалар белгиланиб, бир гуруҳ ходимларга навбатдаги махсус унвонлар топширилди
2024-01-06 11:45:00 / Янгиликлар
Ички ишлар вазири ўринбосари генерал майор Б. Мирзараҳимов томонидан Транспорт ва туризм объектларида хавфсизликни таъминлаш департаменти ходимларига янги йил бошланиши муносабати билан устувор вазифалар белгиланиб, Ички ишлар вазири буйруғи билан навбатдаги махсус унвонлар топширилди.
Жорий йилнинг 6 январь куни ИИВ Транспорт ва туризм объектларида хавфсизликни таъминлаш департаментида вазир ўринбосари томонидан ўтган йил давомида халқимиз тинчлиги, йўловчи ва туристлар хавфсизлигини таъминлаш бўйича кўплаб ютуқларга эришилганлиги, транспорт ва туризм объектларида хусусан, темир йўл, аэропорт ва метрополитенда йўловчи ва фуқаролар ўртасида ҳуқуқбузарликлар, жиноят ҳамда бахтсиз ҳодисаларнинг олдини олиш, юртимизга чет эл давлатларидан ташриф буюрган хорижий туристлар хавфсизлигини таъминлашда амалга оширилган ишлар юзасидан сўз юритилди. Шунингдек, 2024 йил учун мазкур йўналишларда бир қатор манзилли чора-тадбирларни жадаллаштириш, хусусан ходимлар ўртасида хизмат ва ижро интизоми, қонунчилик талабларига қатъий риоя қилиш, шахсий таркиб ўртасида соғлом муҳитни шакллантириш, тарбиявий ишларни жадаллаштириш ва қатор вазифалар юзасидан аниқ кўрсатмалар берилди.
Мазкур тадбир сўнгида, вазир ўринбосари томонидан хизмат вазифасига сидқидилдан ёндашиб, жиноятчиликка қарши курашиш ва ҳуқуқ-тартиботни таъминлаш борасида ҳамкасблари орасида ўрнак бўлиб келаётган Транспорт ва туризм объектларида хавфсизликни таъминлаш департаментининг бир гуруҳ ходимларига навбатдаги махсус унвонлар топширилди.
ИИВ Транспорт ва туризм объектларида хавфсизликни таъминлаш департаменти Ахборот гуруҳи