Андижон вилояти ИИБ раҳбарияти томонидан Избоскан туманида пробация ҳисобидаги шахслар ҳамда муқаддам судланганларнинг муаммоларини ҳал этишга қаратилган сайёр қабул ўтказилди
2025-04-03 09:00:00 / Янгиликлар
Ўзбекистон Республикаси Президентининг 2025 йил 3 январь кунги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги 1-сон қарори ижроси талабларидан келиб чиқиб, жорий йилнинг 2 апрель куни Андижон вилоятининг Избоскан туманида, вилоят прокурори ҳамда Ички ишлар бошқармаси раҳбарияти томонидан пробация ҳисобидаги шахслар, муқаддам судланганларнинг муаммоларини ўрганиш, уларнинг бандлигини таъминлаш мақсадида сайёр қабул ташкил этилди.
Қабулда 50 нафардан зиёд яқин фуқароларнинг турли масалалардаги мурожаатлари тингланди.
Хусусан, тадбиркорлик фаолиятини йўлга қўйиш, кредит олиш, ишга жойлашиш, ер ажратиш ва бошқа ижтимоий масалалардаги аксарият мурожаатлар жойида ижобий ҳал этилди.
Мурожаатларнинг ҳар бири мутасадди идоралар вакиллари томонидан ўрганиб чиқилиб, ечими вақт талаб қиладиган мурожаатлар юзасидан тегишли масъулларга топшириқлар берилди.
Бир сўз билан айтганда, кўплаб фуқаролар мавжуд муаммоларининг ижобий ҳал қилиниши ортида муҳтарам Президентимизнинг олиб бораётган одилона сиёсати ётганлигини мамнуният билан изҳор этдилар.
Бу каби сайёр қабулларнинг ташкил этилиши Андижон вилоятининг бошқа шаҳар-туманларида ҳам давом эттирилмоқда.
Андижон вилояти ИИБ Ахборот хизмати