Ички ишлар вазирлиги ва таълим муассасалари ўртасида ўзбек тилини ривожлантириш бўйича ҳамкорлик меморандуми имзоланди
2025-03-22 18:30:00 / Янгиликлар
Ўзбекистон Республикаси Вазирлар Маҳкамаси ҳузуридаги Ўзбек тилини ривожлантириш жамғармаси, Алишер Навоий номидаги Тошкент давлат ўзбек тили ва адабиёти университети ҳузуридаги Давлат тилида иш юритиш асосларини ўқитиш ва малака ошириш маркази ҳамда Ўзбекистон Республикаси Ички ишлар вазирлиги Малака ошириш институти ўртасида ўзаро ҳамкорлик тўғрисидаги меморандум имзоланди.
Тадбирда Ички ишлар вазирлиги Малака ошириш институти бошлиғи, Ўзбекистон Республикаси Вазирлар Маҳкамаси ҳузуридаги Ўзбек тилини ривожлантириш жамғармаси директори ва Алишер Навоий номидаги Тошкент давлат ўзбек тили ва адабиёти университети ҳузуридаги Давлат тилида иш юритиш асосларини ўқитиш ва малака ошириш маркази директори иштирок этишди.
Мазкур меморандум келгусида ички ишлар органлари ходимларининг ўзбек адабий тили меъёрлари, давлат тилида иш юритиш, расмий ҳужжатлар ва уларни ёзиш бўйича ўқув ва малака ошириш курсларини ташкил этиш, ходимларнинг нутқ маданияти ҳамда нотиқлик маҳоратини ошириш, ўзбек тилини ривожлантиришга оид илмий-тадқиқот ишларини қўллаб-қувватлаш, ўзбек тилининг халқаро мавқейини мустаҳкамлашда ички ишлар органларининг иштирокини таъминлашга қаратилган.
ИИВ Малака ошириш институти Матбуот хизмати