ИИВ Қоровул қўшинлари ҳарбий хизматчилари ўртасида спортнинг миллий кураш тури бўйича «Қўмондон кубоги» мусобақаси ўтказилди
2025-03-17 00:20:00 / Янгиликлар
Миллий кураш қадимий спорт турларимиздан, уни ёш авлод орасида кенг тарғиб қилиш ва оммавийлаштириш мақсадида жойларда кўплаб мусобақалар ташкиллаштирилмоқда, жумладан, яқинда ИИВ Қоровул қўшинлари ҳарбий хизматчилари ўртасида ҳам мазкур спорт тури бўйича «Қўмондон кубоги» мусобақаси ўтказилди.
Мусобақа аввалида қўшин қўмондони полковник Хасан Батиров нутқ сўзлаб, ҳарбий хизматчилар жисмоний ва жанговар салоҳиятини оширишга қаратилган бу каби спорт тадбирларини ўрни ва аҳамияти хусусида тўхталиб ўтди ҳамда барча иштирокчиларга муваффақият тилаган ҳолда мусобақани очиқ деб эълон қилди.
Тошкент вилоятида жойлашган 7535 ҳарбий қисм мезбонлик қилган мазкур беллашувларда, спортчилар 7 та вазн тоифасида ғолиблик учун гиламга чиқишди.
Қизғин ва муросасиз тарзда ўтган ушбу баҳсларда, полвонлар ўз куч ва иродасини намойиш этиб мухлисларга бир-биридан шиддатли баҳсларни тақдим этишди.
Мусобақа якунларида ўз вазн тоифасига кўра :
60 кг да – Жасур Эгамбердиев
66 кг да – Сафармурод Панжиев
73 кг да – Илҳомжон Муҳаммадиев
81 кг да – Юсуфбек Файзуллаев
90 кг да – Фурқат Жалилов
100 кг да – Фазлиддин Қўчқоров
+100 кг да – Мансур Камоловлар шоҳсупанинг юқори поғонасига кўтарилган бўлса, умумжамоа ҳисобида эса ғолиблик ҳамда кубокни 7534 ҳарбий қисм жамоаси қўлга киритди, 2 ва 3-ўринлар эса 7535 ва 7531 ҳарбий қисм жамоаларига насиб этди. Ғолиб ва совриндорларга диплом ҳамда қимматбаҳо совғалар тантанали тарзда топширилди.
Мусобақа якунида, намунали кўргазмали оркестр томонидан намойиш этилган концерт йиғилганларга кўтаринки кайфият улашди.
ИИВ Қоровул қўшинлари қўмондонлиги Ахборот гуруҳи