Бухоро вилояти ИИБ бошлиғи Икромжон Турсунов Ғиждувон туманидаги «Тошлоқ» ва «Оқработ» маҳаллаларида амалга оширилаётган чора-тадбирлар билан танишди
2025-03-03 10:10:00 / Янгиликлар
Вилоятда Президент қарорига асосан 55 та оғир тоифали маҳаллаларда ҳуқуқбузарликларнинг олдини олиш ва хавфсиз муҳит яратиш бўйича ишлар олиб борилмоқда. Ушбу маҳаллаларда инфратузилмани яхшилаш, тозалаш-ободонлаштириш, ижтимоий муаммоларни ҳал этиш ҳамда аҳоли бандлигини оширишга қаратилган саъй-ҳаракатлар жадаллаштирилган.
Шунингдек, бошқарма бошлиғи маҳалла фаоллари ва аҳоли билан мулоқот қилиб, уларнинг муаммоларини ўрганди. «Камбағалликдан фаровонлик сари» дастури доирасида тадбиркорлик ва ҳунармандчиликни ривожлантириш, хонадонларда кичик иссиқхоналар барпо этиш ҳамда ишсиз фуқароларни даромадли иш билан таъминлаш бўйича кўрсатмалар берилди. Бундан ташқари, «Хавфсиз кўча» ва «Хавфсиз йўлак» лойиҳалари асосида йўл ҳаракати хавфсизлигини ошириш ҳамда видеокузатув тизимларини кенгайтириш масалалари ҳам кўриб чиқилди.
Ҳудудда экологик ҳолатни яхшилаш ва ободонлаштириш ишлари доирасида «Яшил макон» лойиҳаси асосида дарахт экиш, ариқ ва зовурларни тозалаш, бетонлаштириш каби тадбирлар амалга оширилмоқда. Белгиланган вазифаларнинг бажарилиши доимий назоратга олиниб, бу каби ўрганишлар давом эттирилмоқда.
Бухоро вилояти ИИБ Ахборот хизмати