Ички ишлар вазирлигига қарашли “Жар” спорт-соғломлаштириш мажмуасида волейбол бўйича эркаклар жамоалари ўртасида Ўзбекистон чемпионатининг тантанали очилиш маросими бўлиб ўтди
2025-02-22 21:00:00 / Янгиликлар
Мамлакат миқёсидаги йилнинг илк нуфузли волейбол мусобақасининг тантанали очилиш маросимида Ички ишлар вазири, Ўзбекистон волейбол федерацияси раиси Пўлат Бобожонов, Спорт вазири ўринбосари Шахрулла Маҳмудов, Миллий олимпия қўмитаси бош котиби Ойбек Қосимов, Тошкент шаҳар ҳокими ўринбосари Дилдора Раҳимова, Россия Федерацияси волейбол федерацияси вакиллари, мамлакатимиздаги дахлдор ташкилот мутасаддилари иштирок этдилар.
Тадбирда сўзга чиққанлар юртимизда оммавий спортни ривожлантириш, иқтидорли спортчиларни саралаш тизимини янги босқичга олиб чиқиш устувор вазифа эканлигини таъкидлашди. Ўтказилаётган Ўзбекистон чемпионати айни мақсадларга хизмат қилиши эътироф этилиб, мусобақада қатнашаётган барча жамоаларга омад тилашди.
Айтиш лозим, мамлакат чемпионати учта турдан иборат бўлиб, унинг бу йилги 1-тур ўйинларида ҳар йилгидан кўп жамоа иштирок этмоқда.
Тошкентдаги “Жар” спорт мажмуасида ҳамда Тошкент транспорт университети спорт мажмуаларида ўтказилаётган чемпионат баҳсларида мамлакатимизнинг турли ҳудудларидан 20 та жамоа ғолиблик учун кураш олиб бормоқда.
Мусобақаларни кузатиб бориш, маҳоратли спортчиларни аниқлаш мақсадида Ўзбекистон волейбол федерацияси томонидан тажрибали мураббийлар, хорижлик мутахассислардан иборат тренерлар штаби ташкил этилган. Уларга беллашувларни юқори савияда ташкил этиш ҳамда халқаро мусобақаларда ватанимиз шарафини ҳимоя қиладиган терма жамоаларга захира спортчиларни танлаш каби вазифалар белгиланган.
Шу ўринда барча иштирокчиларга келажакда Ватанимиз байроғини дунё ареналарида юқори чўққиларга кўтариш насиб этишини тилаймиз. Мазкур чемпионат баҳслари жорий йилнинг 26 февраль кунига қадар давом этади.
ИИВ Ахборот хизмати