«Обод ва хавфсиз маҳалла» тамойили асосида хавфсиз муҳитни яратиш механизми бўйича амалга оширилган ишларни ўрганиш натижаси юзасидан йиғилиш ўтказилди.

Вилоят ҳокими Зойир Мирзаев ҳамда ИИББ бошлиғи Т. Арипов раислигида ўтган йиғилишда сектор раҳбарлари, прокуратура, ички ишлар органларининг тегишли соҳавий хизмат вакиллари, шунингдек, бошқа тааллуқли ташкилот ва идоралар масъуллари иштирок этди. Унда жорий йил давомида ҳудудларда ҳуқуқбузарликларнинг барвақт олдини олиш, ижтимоий профилактика борасида белгиланган устувор вазифалар ижросининг аҳволи, шунингдек йўл қўйилаётган камчиликлар муҳокама этилди.

Вилоятда жорий йил бошидан ижтимоий профилактика объекти ҳисобланган 14 тоифадаги 69 минг 928 нафар фуқарода аниқланган муаммоларини ижобий ҳал этиш бўйича «Э-Ижтимоий профилактика» электрон тизими орқали профилактика инспекторлари томонидан маҳалладаги масъулларга хулосалар тақдим этилган. Шундан 1,3 фоиз хулосалар бажарилмаганлиги танқид қилинди. Асосан, Ангрен шаҳар, Тошкент, Ўртачирчиқ туманларига ҳиссасига тўғри келаётганлиги таъкидланди.

Шунингдек, маҳаллада фаолият олиб борувчи «еттилик» вакилларининг узвий ҳамкорлигини йўлга қўйган ҳолда иш самарадорлиги эришиш зарурлиги борасида сўз юритилди.

Йиғилиш сўнгида қарор доирасида келгусида амалга оширилиши лозим бўлган ишлар белгилаб олинди.