Ўзбекистон Республикаси ИИВнинг ихтисослаштирилган мактаб-интернатида Ботир Зокиров таваллудининг 88 йиллигига бағишланган “Куйламоқ -яшамоқ демакдир!” номли концерт дастури бўлиб ўтди
2024-12-18 09:22:00 / Янгиликлар
Ўзбекистон Республикаси ИИВнинг ихтисослаштирилган мактаб-интернатида ўзбек миллий эстрадасининг асосчиси, туганмас истеъдод соҳиби, хушовоз хонанда, рассом, Ўзбекистон халқ артисти — Ботир Зокиров таваллудининг 88 йиллигига бағишланган “Куйламоқ -яшамоқ демакдир!” номли концерт дастури бўлиб ўтди.
Маънавий-маърифий тадбир дастури давомида севимли хонандамизнинг қўшиқлари мактаб-интернат ўқувчилари талқинида куйланди, ҳаёти ва ижоди ҳақида маълумотлар берилди. Хонанданинг қўшиқлари куйланган миллий кинофилмлардаги тароналарни саҳна кўриниши орқали намойиш этишди. Тадбирга хонанданинг оила аъзоси Ботир Зокировни ҳаммадан кўра яқиндан билган Ўзбекистон, Қорақалпоғистон, Қозоғистон, Қирғизистон, Тожикистон, Татаристон, Ингушетия, Бошқирдистон халқ артисти унвонлари билан тақдирланган, 2017 йилда Қирғизистоннинг “Дўстлик”, 2018 йилда Ўзбекистоннинг “Фидокорона хизматлари учун” ва 2023 йилда “Эл-юрт ҳурмати” орденларига муносиб кўрилган, Ўзбекистон халқ артисти, Афсонавий “Ялла” ансамбли бадиий раҳбари Фаррух Зокиров ташриф буюриб, Ботир Зокировнинг санъат йўли ҳақида, унинг санъатга муҳаббати тўғрисида тўлқинланиб гапирди. Фаррух Зокиров ўз нутқида бу тадбирдан ўзгача завқ олганини, мактаб-интернат ўқувчиларининг санъатга бўлган қизиқиши ва интилишларини эътироф этди. Тадбир иштирокчилари ижро этган қўшиқларга томошабинлар ҳам жўр бўлишди. Маънавий-маърифий тадбир кўтаринки руҳда ўтди ва ўқувчиларда катта таассурот қолдирди.
Бундай тадбирларнинг ўтказилиши ёш авлод қалбида санъатга бўлган муҳаббатни шакллантиришда дастурул амал бўлади. Зеро, мусиқа эзгулик учун хизмат қилади, қалби санъатга ошуфта инсон ҳар доим яхшилик тарафдори бўлади.
ИИВнинг ихтисослаштирилган мактаб-интернати