Назоратдаги шахслар билан қайта жиноят содир этилишининг олдини олишга қаратилган йиғилиш ўтказилди
2024-12-16 22:45:00 / Янгиликлар
ИИВ Жамоат хавфсизлиги департаменти бошлиғи ўринбосари, полковник Шароф Уралов ҳузурида Пробация бошқармаси ходимлари ҳамда ҳудудий бўлинма бошлиқлари иштирокида онлайн видеоселектор йиғилиши ўтказилди.
Кун тартибида жамоат тартибини сақлаш ва фуқаролар хавфсизлигини таъминлаш мақсадида назорат остидаги шахслар билан боғлиқ қайта жиноят ва ҳуқуқбузарликларнинг олдини олиш, уларни жамиятга ижтимоий мослаштириш, бандлигини таъминлашга кўмаклашиш борасида қилинаётган ишлар, соҳани рақамлаштиришга оид вазифалар ҳамда республикамиз миқёсида эълон қилинган «Хавфсиз ҳудуд – долзарб 50 кунлик» махсус профилактик тадбири доирасида амалга оширилаётган ишлар таҳлилий муҳокама этилди.
Жараёнда Жамоат хавфсизлиги департаменти бошлиғи ўринбосари ҳудудий бўлинма бошлиқларининг ҳисоботлари тинглаб, ўтказилган профилактик тадбирларда камчиликларга йўл қўйган масъул раҳбарларга тегишли кўрсатма ва топшириқлар берди. Шунингдек, полковник Шароф Уралов «Пробация тўғрисида»ги Қонун ҳамда қонуности ҳужжатларига мувофиқ, жойларда тарғибот ва ташвиқот ишларини янада кучайтириш лозимлигини алоҳида таъкидлади.
ИИВ ЖХД Ахборот хизмати