Ўзбекистон Республикаси Ички ишлар вазирлиги

Мардлик ва қаҳрамонлик унутилмайди. Айниқса, умрини юрт тинчлиги, осойишталиги йўлида сафарбар этганларнинг ибратли ҳаёти орадан йиллар ўтсада, оғиздан оғизга кўчиб, мангу қаҳрамонлик эртагига айланади.

Мақоламиз қаҳрамони Тошпўлат Мамадалиевнинг номи ҳам фахру ифтихор билан тилга олинади. Тошпўлат ота 1924 йилда Янгиқўрғон туманида туғилган. Унинг айни ёшлик йиллари Иккинчи жаҳон уруши йилларига тўғри келди. Ҳали ўн етти ёшга етмаган йигит Самарқанддаги дала машқ мактабига ўқишга юборилиб, жанговар тайёргарликдан ўтгач, фронтга отланди. 168-ўқчи дивизия сафида взвод командирининг ёрдамчиси бўлиб, урушнинг дастлабки кунларидаёқ душман генералини асирга олди. Бу жасорати учун «Улуғ Ватан уруши» ордени билан тақдирланди.

Ўнлаб шаҳар ва қишлоқларни фашизм зулмидан озод этишдаги ва Сталинград остонасидаги жангларда унинг қаҳрамонликлари китоблардан жой олди. Урушдан кейин ҳам ёш ўғлон жанг майдонларини душман миналаридан тозалашда иштирок этиб, бир неча қадам нарида портлаган мина бўлакларидан оғир ярадор бўлиб, Ватанга қайтди. Госпиталда узоқ вақт даволаниб, оёққа турди.

Урушдан кейинги йилларда Тошпўлат Мамадалиев узоқ йиллар ички ишлар органлари сафида оддий тезкор ходимдан туман ички ишлар бўлими бошлиғи лавозимигача бўлган шарафли йўлни босиб ўтди. Бўз, Шаҳрихон, Учқўрғон, Янгиқўрғон тумани ИИБларига раҳбарлик қилди. Юзлаб шогирдларнинг устози сифатида улардан кўмаги, ёрдамини аямади.

Ота бошлаб берган анъанани муносиб давом эттирган Тошпўлат отанинг ўғиллари истеъфодаги полковниклар Илҳом ва Икром Мамадалиевлар кўп йиллар раҳбарлик лавозимларида сидқидилдан хизмат қилишди. Истеъфодаги подполковник, Фахриддин Мамадалиев эса Наманган вилояти ИИБ Жиноят қидирув бошқармаси бўлим бошлиғи лавозимида жиноятчиликка қарши курашишда фидойилик намунасини кўрсатди. Ҳозир 3 ака-ука пенсияда, оила даврасида умргузаронлик қилишмоқда. Истеъфодаги полковник Илҳом Мамадалиев ИИВ Фахрийлар кенгаши аъзоси сифатида ёшларни касбга, Ватанга муҳаббат руҳида тарбиялашда ўзининг катта ҳиссасини қўшиб келмоқда. Айни пайтда сулоланинг давомчилари набиралар орасида ҳам соҳада фаолият олиб бораётганлари ҳам бор.

Яқинда Наманган шаҳридаги «Шодиёна» тантаналар мажмуасида Тошпўлат Мамадалиев таваллудининг 100 йиллиги муносабати билан тадбир ташкил этилиб, шогирдлари, фарзандлари, набиралари у кишининг инсоний фазилатлари, мардлиги ва жасоратини ёдга олдилар. ИИВ Фахрийлар кенгаши раиси, истеъфодаги генерал майор Эркин Норгитов, вилоят ИИБ Фахрийлар маркази раиси ўринбосари, истеъфодаги полковник Тоҳиржон Нугманов, Тошпўлат отанинг шогирдлари ўтганларни хотирлаш эзгу қадриятларимиздан экани, мардлик ва жасорат унутилмаслигини таъкидладилар. Тошпўлат ота Мамадалиевнинг Ватан ва халқ олдидаги хизматларини эътироф этдилар. Фарзандлари отасининг чин инсонийлик сабоқлари, ҳалоллик, камтаринлик ҳақидаги ўгитларига амал қилиб, ҳаётда ўз ўрнини топганликларини айтиб, миннатдорликларини изҳор этдилар.

Шукуҳли даврада жасур ўғлоннинг шаънига айтилган яхши гаплар Ватан тинчлиги йўлида олиб борилган мардлик унутилмаслигининг бир исботи бўлди.

Гулчеҳра Бувамирзаева, ўз мухбиримиз. «Постда»
Наманган вилояти