“Энг намунали эксперт-криминалистика жамоаси” ҳамда “Энг яхши эксперт-криминалист” республика кўрик-танловлари якунланди
2024-10-14 11:05:00 / Янгиликлар
Бухоро шаҳрида бўлиб ўтган “Энг намунали эксперт-криминалистика жамоаси” ҳамда “Энг яхши эксперт-криминалист” Республика кўрик-танловида ҳудудий саралаш босқичидан ўтган 16 та жамоа ва 32 нафар эксперт-криминалистлар “энг яхши” эътирофга сазовор бўлиш учун беллашдилар.
Кўрик-танловнинг республика босқичи юқори савияда жуда қизғин ва кўтаринки руҳда бўлиб ўтди. Бунда экспертларнинг зийраклиги, зукколиги, жиноятларни фош этишдаги илмий-техник салоҳияти бўйича синовлар қабул қилинди.
Кўрик-танловни ўтказишдан асосий мақсад соҳа ходимларини хизматга бўлган иштиёқини кучайтириш, касбий тайёргарлик сифатини ошириш, муносиб эксперт-криминалист ходимлари орасидан энг яхшиларини аниқлаш ва уларни ижтимоий қўллаб қувватлашдан иборат.
Танлов иштирокчилари белгиланган вазифаларни муваффақиятли уддалаб, бор билим ва касбий кўникма маҳоратларини намоён этишди.
Беллашувнинг синов натижаларига кўра, ИИВ Академияси Криминалистик экспертизалар кафедраси жамоаси “Энг намунали эксперт-криминалистика жамоаси” номинацияси бўйича ғолиб деб топилди.
Иккинчи ўринни Тошкент вилояти ИИББ эксперт-криминалистика маркази жамоаси ҳамда учинчи ўринни Хоразм вилояти ИИБ эксперт-криминалистика маркази эгалладилар.
Шунингдек, “Энг яхши эксперт-криминалист” номинацияси бўйича Фарғона вилояти Марғилон шаҳар ИИБ эксперт-криминалистика гуруҳи катта эксперти капитан Тохиржон Иброхимов ғолиб деб топилди.
Иккинчи ўринни Сурхондарё вилояти Термиз шаҳар ИИБ эксперт-криминалистика гуруҳи катта эксперти катта лейтенант Ислом Норбеков ва Сирдарё вилояти ИИБ эксперт-криминалистика маркази катта эксперти майор Зафар Арзиқуловлар эгалладилар.
Самарқанд вилояти ИИБ эксперт-криминалистика маркази бош эксперти подполковник Азамат Аббосов, Андижон вилояти ИИБ эксперт-криминалистика маркази катта эксперти капитан Миржалол Мадаминов ва Бухоро вилояти ИИБ эксперт-криминалистика маркази бош эксперти подполковник Жаҳонгир Шариповлар учинчи ўрин соҳиблари бўлишди.
Ўтказилган кўрик-танлов, шахсий ва жамоавий биринчиликлар натижасида эксперт-криминалистика соҳасида илмий тадқиқот ишларини ривожлантиришга, профессионал касб маҳоратига эга бўлган истеъдодли криминалистларни аниқлашга, истиқболли кадрлар захирасини шакллантиришга ҳамда ўз касбига бўлган садоқат, ғурур ва ифтихор каби ҳис-туйғуларини кучайтиришга хизмат қилади.
ИИВ Эксперт-криминалистика бош маркази