Қашқадарё вилояти ички ишлар органларида фаолият юритаётган психолог ходимлар ўртасида «Энг яхши психолог» танлови ўтказилди
2024-10-04 11:50:00 / Янгиликлар
Танловда ички ишлар органларида психологик таъминлашнинг сифат жиҳатдан самарадорлигини янада ошириш ҳамда ушбу соҳада фаолият юритаётган психологлар ўртасида соғлом рақобатни яратиш орқали етук мутахассис психолог кадрлар сафини кенгайтиришга қаратилган тадбирда иштирокчилар бор маҳорат ва тажрибаларини ишга солиб ўзаро беллашдилар.
Кўрик–танловда психологик тест ёрдамида иштирокчиларнинг билим савияси ва IQ даражаси аниқлаш, психология соҳасини ривожлантиришга қаратилган ғоя ва уни амалиётга жорий қилиш бўйича фикрлар ва савол-жавоблар асосида кечган баҳсларда иштирокчиларнинг тарғибот-ташвиқот ишлари ҳамда психология касбини ёритишга қаратилган ғоялари, билим ва тажрибаси синовдан ўтказилди.
Ҳакамлар ҳайъати томонидан эълон қилинган натижаларга кўра, вилоят ички ишлар бошқармаси маънавий-маърифий ишлар ва кадрлар билан таъминлаш хизмати бош инспектори, капитан Ҳамза Ниязов ғолибликни қўлга киритди. Навбатдаги совринли ўринларни эса Қамаши тумани ички ишлар бўлими вояга етмаганлар ва ёшлар билан ишлаш гуруҳи катта инспектори, катта лейтенант Ойбек Дўстқобилов ва Нишон тумани ички ишлар бўлими вояга етмаганлар ва ёшлар билан ишлаш гуруҳи катта инспектори, лейтенант Мафтуна Туплиева банд этишди.
Иштирокчилар ғолиблик дипломи ва қимматбаҳо совғалар билан тақдирланди.
Энди ғолиб танловнинг Республика босқичида иштирок этади.
Қашқадарё вилояти ИИБ Ахборот хизмати