Қўшқанотлар. Улкан орзулар рўёби
2024-09-18 07:25:00 / Янгиликлар
Бу оилани Олмалиқ шаҳрида кўпчилик яхши билади. Шаҳар ИИБнинг турли соҳавий хизматларида йигирма олти йиллик фаолияти давомида фидойилик билан хизмат қилган истеъфодаги подполковник Тимур ва Гулноза Сабриевалар касбидан бахт топишган. Вақтинчалик сақлаш ҳибсхонаси бошлиғи лавозимидан иззат-икром билан пенсияга кузатилган лавҳамиз қаҳрамони ҳозирда Олмалиқ шаҳар «Инсон» ижтимоий хизматлар марказида ҳуқуқий масалалар бўйича эксперт-маслаҳатчи бўлиб фаолият олиб бормоқда.
— Турмуш ўртоғим билан ўн саккиз йилдан буён оиладаги барча муаммоларни биргаликда, бамаслаҳат ҳал этиб келяпмиз, — дейди оила бошлиги. — Балки оиланинг мустаҳкамлиги ҳам шундадир.
- Хонадонларимиз саришталари бўлмиш аёлларга доимо ёрдам кўрсатиб келаман, — дейди хотин-қизлар масалалари бўйича катта инспектор, подполковник Г. Сабриева . -Шу соҳада хизмат қилаётганимдан чексиз фахрланаман.
Хизмати давомида эришган барча ютуқларнинг сабабчиси, аввало, устозлари деб биладиган Гулноза Сабриеванинг ўзи ҳам катта лейтенант Азамат Акбаров, лейтенантлар Сўғдиёна Шодиева ҳамда Омина Зоитова каби шогирдларининг устозидир.
Бугунги кунда икки ўғилни тарбиялаб келаётган бу оила соҳиблари келажакда уларнинг ҳам ўзлари каби эл-юртга нафи тегадиган инсонлар бўлиб камол топиши йўлида жонкуярлик қилиб келаётир. Катта ўғли Жавоҳир тадбиркор, кенжаси Жасур эса ҳуқуқшунос бўлишни дилига туккан. Биз ҳам уларнинг беғубор орзулари амалга ошишига тилакдошмиз.
Михли САФАРОВ, ўз мухбиримиз.
Тошкент вилояти.