Ички ишлар вазирлиги тасарруфидаги 5-сон «Наврўз» номли мактабгача таълим ташкилоти тўлиқ реконструкция қилиниб фойдаланишга топширилди
2024-09-10 11:15:00 / Янгиликлар
Ёшларга ва таълимга эътибор келажакка эътибор. Бугун мамлакатимизда ёшлар тарбияси ҳамда уларнинг илм олиши, келгусида Ватан тараққиёти учун камарбаста фарзандларни тарбиялаш давлатимизнинг муҳим устувор вазифаларидан бирига айланган.
Хусусан, бу борада мактабгача болаларни таълимнинг энг бошланғич нуқтаси билан қамраб олиш, уларнинг дунёқараши ҳамда билим кўникмасини шаклантириш мақсадида Мактабгача таълим ташкилотлари фаолиятини яхшилаш, моддий техник базасини янгилаш борасида қатор тизимли ишлар амалга оширилмоқда. Айни мақсадда Шаҳримизнинг Яккасарой туманида Ички ишлар вазирлиги тасарруфидаги 5-сон «Наврўз» номли мактабгача таълим ташкилоти тўлиқ реконструкция қилиниб, замонавий жиҳозлар билан таъминланди.
Муассасанинг тантанали очилиш маросимида Ички ишлар вазири ўринбосари генерал-майор Даврон Назармухаммедов сўзга чиқиб, мактабгача таълим ташкилоти айни кунда 240 ўринга мўлжалланиб барча қулайлик ҳамда шароитлар яратилганлиги, бу каби имкониятлар тизимда хизмат қилаётган ходимларни ижтимоий қўллаб қувватлаш мақсадида амалга оширилаётганлигини таъкидлаб, муассасага дамас автомашинаси ҳамда болажонлар учун совғалар тантанали топширилди.
Тадбир давомида вазир ўринбосари, тизим фахрийлари, ва меҳмонлар мазкур мактабгача таълим ташкилотида яратилган шароит ва қулайликлар билан яқиндан танишишди. Замонавий бино ва хоналар, мусиқа ва ўйин майдончалари, шунингдек, йўл ҳаракати майдончалари айни кунда болажонларнинг сифатли таълим олиши ҳамда бўш вақтини мазмунли ўтказиш учун ташкил этилган.
Мухтасар айтганда Наврўз мактабгача таълим ташкилоти бугун замонавий қиёфада ўз бағрига болажонларни чорламоқда.