Ўзбекистон Республикаси Ички ишлар вазирлиги

Тадбирни ўқув даргоҳи раҳбари Рустам Хатамов очиб, Янги Ўзбекистонни барпо этишда таълимнинг ўрни, барча соҳалар қатори ички ишлар органларини янги авлод кадрлари билан таъминлаш борасида амалга оширилаётган тизимли чора-тадбирлар ҳақида сўз юритди.

Шундан сўнг Конгратбай Шарипов олий таълим тизимидаги улкан ўзгаришларга тўхталди. Таъкидланганидек, инсон капиталини ривожлантириш мамлакатимизда энг устувор вазифалардан бири саналади.

«Ўзбекистон – 2030» стратегиясининг дастлабки 12 та мақсади бевосита таълимни ислоҳ қилишга қаратилган. Шу билан бирга, замонавий билим ва юксак маънавий-ахлоқий фазилатларга эга, мустақил фикрлайдиган юқори малакали кадрлар тайёрлаш жараёнини сифат жиҳатидан янги босқичга кўтариш мақсадида Олий таълим тизимини 2030 йилгача ривожлантириш концепцияси қабул қилинган.

Айтиш жоизки, соҳадаги изчил ислоҳотлар натижасида охирги етти йилда олий таълимга қамров даражаси 9 фоиздан 42 фоизга етказилиб, олий ўқув муассасалари сони 200 дан оширилди.

Бугунги кунда мамлакатимиздаги мавжуд 219 та олий таълим муассасасининг 31 таси хорижий олий таълим ташкилотлари бўлса, 93 тасини нодавлат олий таълим муассасалари ташкил этмоқда.

Тараққиётнинг тамал тоши илм-фан ва таълим-тарбияга боғлиқ. Шу боис, жаҳоннинг етакчи давлатлари таълимни ривожлантириш масаласига биринчи галдаги вазифа сифатида қараб келмоқда.

Мамлакатимизда ҳам ёшлар салоҳиятини ошириш, уларнинг ўқиши, таълим олиши учун муносиб шарт-шароитлар яратишга давлат сиёсатининг устувор йўналишлари қаторида эътибор қаратилмоқда.

Чунки таълим соҳасини тизимли такомиллаштириш орқалигина мамлакатнинг изчил ривожланиши ва жаҳон таълим ҳамжамиятига муваффақиятли интеграциялашувини таъминлаш мумкин, – деди Конгратбай Шарипов.

Очиқ мулоқотда мамлакатимиз тараққиётининг ҳозирги босқичида ушбу соҳада амалга оширилаётган ислоҳотлар, таълим тизимига жорий қилинаётган инновацион ёндашувлар, бу борада эришилаётган ютуқлар, соҳани ривожлантиришга оид стратегик мақсад ва вазифаларнинг пировард натижалари хусусида атрофлича фикр юритилди.

Шу билан бирга, олий таълим муассасаларида тарбиявий ишларни кучайтириш, ёш авлоднинг ҳуқуқий онги ва маданиятини юксалтириш орқали ёшлар ўртасида ҳуқуқбузарликларнинг барвақт олдини олиш, мазкур йўналишда ҳамкорликни мустаҳкамлаш, ёшлар билан манзилли ишлаш бўйича методик қўлланмалар яратиш масалаларига алоҳида эътибор қаратилди.

Олий таълим, фан ва инновациялар вазири академия фаолиятига тўхталар экан, кейинги йилларда таълим масканида самарали ўзгаришлар амалга оширилганини қайд этди.

Айниқса бакалавриат ва магистратурадан иборат икки босқичли тизимнинг жорий қилингани, ўқув жараёнлари мутлақо янгича механизмлар асосида ташкил қилинаётгани, халқаро ҳамкорлик алоқалари ва хорижий тажрибаларни ўрганишга кенг йўл очилаётгани ички ишлар органлари учун малакали кадрлар тайёрлашга хизмат қилиши таъкидланди.

ИИВ Академияси Ахборот хизмати