Ўзбекистон Республикаси Ички ишлар вазирлиги

Дарвоқе, ҳақ гап. Ахир, «Сабр қилган — етар муродга» деган мақол бу фикрни тасдиқлайди. Ҳаётда бунга мисоллар ҳам, сабр қилиб, машаққатларни енгган ва жамиятда кўпчиликка ўрнак бўлиб келаётган инсонлар ҳам кўп.

Лавҳамиз қаҳрамони вилоят ИИБ Эксперт-криминалистика маркази бош эксперти, подполковник Истам Алимов сабр-тоқатли, меҳнаткаш инсон. У қарийб 19 йилдан бери шу соҳанинг ичида юриб, жиноятларни фош қилиш ва жамиятда адолат қарор топиши учун ўз умрини, билимини, салоҳияти ва меҳнатини аямай келмоқда.

ИИВ Академиясини тамомлаб, 2005 йилда хизмат фаолиятини бошлаган бўлса, бугунга қадар у кўплаб жиноятларни очишда иштирок этди. Биргина жорий йилнинг ўзида воқеа жойларида 42 та экспертиза текширувини ўтказган бўлса, улардан 39 та ҳолатда жиноятни очувчи ашёвий далиллар олинишига эришди.

Яна 53 марта тергов ҳаракатларида, 78 марта тезкор-қидирув ҳаракатларида қатнашди. Унинг ҳушёрлиги ва кўмаги билан кўплаб жиноятлар «иссиқ изида» очилишига эришилди.

Ашёвий далиллар жиноятни фош қилиш ва қонун адолатини таъминлашда ниҳоятда муҳим саналади, — дейди Истам Алимов.

Шунинг учун ҳам ҳар бир текширувда ўз вазифамга масъулият билан ёндашишга ҳаракат қиламан. Асосийси, ҳеч бир детални эътибордан четда қолдирмаслик лозим.

Подполковник Истам Алимов 6 йўналишда эксперт текширувларини ўтказиш учун махсус рухсатномаларга эга.

Буларга у, албатта, ўқиб-ўрганиб, ўз устида ишлаб, тажрибалар орттирган ҳолда эришган. Шу маънода, қаҳрамонимиз ўта тиришқоқлиги билан бошқаларга ўрнак кўрсатиб келмоқда.

У бундай фазилатлари туфайли 2021 йилда ички ишлар органларининг III даражали «Бенуқсон хизматлари учун» кўкрак нишони билан тақдирланган.

Истам Алимов бўш вақтида детектив романлар мутолаа қилишни хуш кўради. Албатта, китобсевар ота сифатида фарзандларига китоблар совға қилишга, улар билан бирга китоб ярмаркаларига боришга ҳам вақт топади.

©️ «Postda» газетаси, Феруза Раҳмонқулова, Сурхондарё вилояти.