Туманларда ўтказилган муҳокама йиғилишларида бошқарма бошлиғи подполковник Икромжон Турсунов томонидан Ички ишлар вазирининг тегишли буйруғи билан Қоровулбозор туман ИИБга подполковник Алимардон Жумаев, Жондор туман ИИБга подполковник Абдухалил Носиров, Когон туман ИИБга эса подполковник Зафар Давронов раҳбар этиб тайинлангани эълон қилинди. Бошқарма бошлиғи уларнинг хизмат фаолияти йўли билан иштирокчиларни таништириб, келгусидаги долзарб вазифаларни белгилаб берди.

Туман ҳокимлари ва бошқа сектор раҳбарлари иштирокида ўтказилган муҳокама йиғилишларида подполковник Икромжон Турсунов томонидан ҳудудларда криминоген вазиятни барқарорлаштириш, жиноят ва ҳуқуқбузарликларни олдини олиш борасидаги манзилли ишларни изчиллик билан давом эттириш масалаларини атрофлича муҳокама қилинди.

Шунингдек, шахсий таркиб ўртасида хизмат интизоми ва қонунийликни мустаҳкамлаш, коррупцион ҳолатларни олдини олиш, мурожаатлар билан ишлашга энг муҳим вазифа сифатида қараб, алоҳида назоратга олиш, тамагирлик ва бошқа шунга ўхшаш салбий ҳолатларга қарши муросасиз бўлишни қатъий таъкидлади.

Бу каби муҳокама йиғилишларининг тизимли олиб борилиши, хизмат вазифаларини бажаришга масъулиятсизлик билан ёндашган, ижро ва хизмат интизоми ҳамда қонунчилик талабларини бузган ҳар қандай тоифадаги масъул раҳбар ва ходимларга нисбатан кескин таъсир чоралари қўлланилиши қатъий белгиланди.

Муҳокама йиғилишлари давом этмоқда.

Бухоро вилояти ИИБ Ахборот хизмати