ИИВ Малака ошириш институти ёш мутахассислар амалиёт билан боғланган ҳолда тажрибаларини орттиришмоқда
2024-07-18 12:20:00 / Янгиликлар
Айни кунларда Ички ишлар вазирлиги Малака ошириш институти Касбий тайёргарлик факультетида «Йўл-патруль фаолияти» йўналиши бўйича таҳсил олаётган бўлажак ёш мутахассислар Тошкент шаҳар ички ишлар бош бошқармаси Йўл ҳаракати хавфсизлиги хизмати, йўл-патруль хизмати бригадаси баталонларида назарий билимларини амалиёт билан узвий боғлаган ҳолда зарур тажрибаларини орттиришмоқда.
Тингловчиларнинг бир қисми Пойтахтимизнинг Яшнобод ва Миробод туманлари ҳудудида йўл ҳаракати хавфсизлиги бўйича амалий кўникмаларни ўзлаштиришаётган бўлса, бошқалари тарғибот-ташвиқот ва рейд амалиёти доирасида аҳоли гавжум масканларда бўлиб амалий билимларга эга бўлмоқда.
Шунингдек, Тошкент шаҳар ички ишлар бош бошқармаси Йўл ҳаракати хавфсизлиги хизмати, йўл-патруль хизмати бригадаси баталонларида тингловчилар мавжуд техникалар, боди камера ҳамда планшетлар ва уларнинг имкониятлари билан танишдилар. Мутахассислар кўмагида уларни кўздан кечириб, керакли маълумотларга эга бўлдилар. Амалиёт доирасида тингловчиларнинг бевосита иштироки орқали ҳудудларда йўлларда ҳаракатланиш хавфсизлигини таъминлаш ва йўл-транспорт ҳодисаларининг олдини олиш борасидаги билимлари ҳам мустаҳкамланмоқда.
Ҳудудларда йўлларда ҳаракатланиш хавфсизлигини таъминлаш ва йўл-транспорт ҳодисаларининг олдини олиш борасидаги профилактик тарғибот тадбирлари, ўтказилаётган рейд тадбирлари давомида транспорт воситасини маст ҳолда, тегишли ҳужжатларсиз бошқарган, қўпол турдаги қоидабузарликлар содир этган ҳайдовчиларга тегишли тартибда чоралар кўриш борасида тингловчилар ўзларида керакли кўникмаларни ҳосил қилмоқдалар.
Амалиётга институт Касбий тайёргарлик факультети Махсус фанлар цикли ўқитувчилари ва масъул йўл-патруль инспекторлари томонидан зарур амалий билимлар бериб борилмоқда. Тингловчиларга йўл ҳаракати қоидаларини бузганлик учун ушланган транспорт воситаларини тўхташ жойларига жойлаштиришда йўл-патруль хизмати ходими ўртасидаги муаммоли вазиятлар бўйича назарий ва амалий кўникмалари мустаҳкамланди.
Тингловчилар амалиёт даври мароқли ва мазмунли ўтаётганлигини таъкидлашмоқда.
ИИВ Малака ошириш институти Матбуот хизмати